Бүгінде автокөлік – көптеген отандасымыздың сенімді серігі, қажетті құралына айналды. Алайда жаңа немесе сапалы қолданыста болған көлікті бірден сатып алу көпшілікке қиын. Осы ретте автонесие тиімді шешім болуы мүмкін. Елдегі банктер қандай шарттар ұсынатынын, ең тиімді ұсыныс қайсы екенін қарастырайық.
Бізде екінші деңгейлі 21 банктің 10-ы автонесие береді. Оның ішінде халыққа кеңінен қолжетімді 7 банк белсенді түрде өз қызметін ұсынып отыр. Автонесиені таңдау кезінде ең маңызды көрсеткіштердің бірі – жылдық тиімді сыйақы мөлшерлемесі (СЖТМ). Қаржы нарығын реттеу және дамыту агенттігі бекіткен ережеге сәйкес, мұндай несиеде максималды СЖТМ 35%-дан аспауға тиіс. Осы шек аясында банктердің ұсыныстарын салыстырып көрейік.
Ең төменгі мөлшерлемені қай банк ұсынады? Әуелі көзге ForteBank түсті. Ол ең төменгі максималды мөлшерлемені ұсынып отыр. 25,3%-ға дейін. Бұл банк арқылы жаңа да, қолданыста болған көлік те сатып алуға болады. Бірақ көліктің шыққан жылы 8 жылдан аспауға тиіс. Одан кейінгі орынға Банк ЦентрКредит пен Freedom Bank жайғасқан. Бұл екі банкте максималды СЖТМ 25,6%-ды құрайды. Бірақ Банк ЦентрКредитте мөлшерлеме тек жаңа көліктерге арналған, ал қолданыста болған автомобильге 32,24%-ға дейін көтеріледі. Сонымен қатар бұл банкте 22,4%-дық СЖТМ-мен Skoda маркалы автокөліктерге арналған арнайы ұсыныс бар. Алайда Skoda бізде аса танымал емес. Келесі Halyk Bank – жаңа көлік үшін максималды СЖТМ 28,3%, ал қолданылған көлік үшін 30,1%. Ал Bereke Bank пен Еуразиялық Банк – бұл екі банк максималды рұқсат етілген 35%-дық СЖТМ көрсетіп отыр. Бірақ олардың автонесиелерді жаңа және қолданыста болған көліктер үшін де қолжетімді.
Несие сомасы мен мерзімі қандай? Елдегі автонесиелердің ең ұзақ мерзімі – 7 жыл. Қарастырылған 7 банктің алтауы дәл осындай мерзімге несие береді. Несиеге қолжетімді ең жоғары сома – 18 млн-нан 50 млн теңгеге дейін. Бұл көрсеткіш банктердің ішкі саясаты мен клиенттің төлем қабілетіне байланысты өзгеруі мүмкін.
2024 жылдың ақпан айының басында Қазақстанда 5,1 млн жеңіл көлік тіркелген, бұл өткен жылмен салыстырғанда 7,6%-ға көп. Алайда елдегі автопарктің едәуір бөлігі ескі. Мысалы, 1,2 млн көлік – 10 жылдан 20 жылға дейін қолданыста жүрген, 2,2 млн көлік – 20 жылдан астам уақыт пайдаланылып келе жатыр.
Сурет: ortcom.kz