Тарихи фильм Шәкен Айманов атындағы «Қазақфильм» студиясының павильондарында «The Golden Empire» жұмыс атауымен түсіріліп жатыр.
«Дара» Президенттік бастамалар қорының қолдауымен жүзеге асырылып жатқан бұл жоба тарихи нақтылық пен драмалық баяндау үйлесім тапқан ауқымды мәдени оқиға болмақ.
Ағылшын тіліндегі деректі-көркем телехикаяның өндірісін Karga Seven Pictures жүзеге асыруда. Бұл компания 90-нан астам елде Netflix-тің ТОП-10 тізіміне енген «Осман империясының өрлеуі» және «Өсиет: Мұсаның тарихы» сияқты жобаларымен танымал. TAURUS Asia Production – жобаның жергілікті серіктесі.
«Дара» Президенттік бастамалар қорының хабарлауынша, 3 наурыз таңғы 6:00-де түсірілім басталған. Алғашқы кадрды түсірмес бұрын, режиссер Эмре Сахин, түрік продюсері Фикрет Маноғлу және TAURUS Asia Production продюсері Анна Чакиртова түсірілім тобын жігерлендіріп, бастамамен құттықтады.
«Бұл жай ғана сериал емес, бұл өткенмен құрылған диалог. Әрқайсыңыз осы тарихты бүгінге жеткізушісіз. Әр қадам – ұжымдық еңбектің нәтижесі. Сценарийден бастап костюмдер мен декорацияға, жарық қоюдан операторлық жұмысқа дейінгі әрбір кезең – алға жылжудың маңызды бөлігі. Біз бірге жұмыс істейміз, бір-бірімізге қолдау көрсетеміз және бұл жобаның ерекше болатынына сенеміз», деді Эмре Сахин.
9:10-да жобаға арнайы жасалған 12 метрлік киіз үйде алғашқы кадр таспаға түсірілді. Ал түске дейін алғашқы дубль сәтті шығып бекітілген соң, түсірілім тобы дәстүрге сәйкес қолтаңбалар қойылған табақты сындырып, қатысушылар естелікке сынықтан ала кеткен.
Қазіргі таңда түсірілім тобы жоғары дайындық деңгейін және ынтасын көрсетіп, белгіленген кестеге сай қарқынды жұмыс істеп жатыр. «The Golden Empire» сериалы Қазақстан киноиндустриясының дамуына елеулі үлес қосып, халықаралық кинематографиялық ынтымақтастықты нығайтуға ықпал ететінен сенім мол.
Фото: «Дара» Президенттік бастамалар қоры