17 ақпан күні Ұлытау облысындағы «Жомарт» кенішінде 7 жұмысшы байланыссыз қалып, бүгін олардың мәйіті табылды.
Қайғылы оқиғадан қаза болған кеншілердің жеке басы анықталып, аты-жөні жарияланды:
1. Қайрат Ақшалов, 49 жаста. 3-разрядты машинист, төрт баланың әкесі. Балаларының үлкені 19, кішісі 4 жаста. Ұлытау ауданында тұрған.
2. Ардақ Жақұбаев , 26 жаста. Жерасты учаскесінің тау-кен шебері, 2 жастағы баласы бар. Сәтпаев қаласында тұрған.
3. Бақытбек Жұмадоллаев, 49 жаста. 3-разрядты жерасты тау-кен жұмысшысы, 4 жастағы баласы бар. Сәтпаев қаласында тұрған
4. Орынбек Кенжебеков, 33 жаста. Жүк тиеу-жеткізу машинасының машинисі. Екі баланың әкесі, кішісі 2 жаста. Жезқазған қаласында тұрған.
5. Ғалымжан Молдабеков, 46 жаста. Теспе бұрғылаушының көмекшісі, төрт баланың әкесі. Жезқазған қаласында тұрған.
6. Олжас Нұрулдаев, 45 жаста. Жерасты учаскесінің энергетигі. Бес баланың әкесі, ең кішісі үш жаста. Жезқазған қаласында тұрған.
7. Константин Рожков, 32 жаста. 3-разрядты жерасты тау-кен қазу жабдығының электр маманы, монтаждаушы. 1 баланың әкесі. Қарағанды қаласында тұрған.
«Қазақмыс» компаниясы қаза болған жұмысшылардың отбасына жерлеу рәсімдері үшін 2 миллион теңге және жұмыскердің орташа жылдық жалақысының 10 еселенген мөлшері берілетінін хабарлады.
Сондай-ақ асыраушысынан айырылу жағдайына байланысты ай сайынғы төлемдер, балалардың оқу ақысын төлеу, қаза тапқан жұмысшылардың несие және қарыздарын жабу, сондай-ақ отбасы мүшелерінің өтініші бойынша басқа да көмек түрлері қарастырылып отыр.
Фото: rawpixel