Алмас Кішкенбаевқа қатысты іс Алматы қаласындағы әкімшілік құқық бұзушылықтар бойынша мамандандырылған ауданаралық сотта қаралады, — деп хабарлайды Tengrinews.kz тілшісі. Сот іс материалдарын қабылдады.
«Сотта Кішкенбаев Алмас Бексейтовичке қатысты әкімшілік құқық бұзушылық бойынша іс бар, ол ӘҚБтК-нің 434-бабы 1-бөлігі («Ұсақ бұзақылық») бойынша. 2024 жылғы 31 қаңтарда іс мәні бойынша қаралуы мүмкін болмады, себебі жәбірленуші, кәмелетке толмаған К.-ның заңды өкілі ауызша өтініш білдіріп, іс материалдарымен танысу үшін қарауды басқа күнге ауыстыруды сұраған», – делінген сот кеңсесінің ақпаратында.
Сот отырысы бүгін, 3 ақпанда өтеді.
Алмас Кішкенбаевқа ӘҚБтК-нің 434-бабы 1-бөлігі бойынша айып тағылып отыр. Осы бап бойынша оған 20 АЕК (78 640 теңге) айыппұл немесе 5-тен 15 күнге дейін әкімшілік қамауға алу жазасы тағайындалуы мүмкін.
Әлеуметтік желілерде Алмас Кішкенбаевтың полицияға жеткізілгені туралы мәлімет тарады.
Алмас Кішкенбаев қазақстандықтарға 2004 жылы Superstar KZ жобасының бірінші маусымында жеңіске жетіп, танымал болған эстрада әншісі ретінде таныс.