«2025 жылы мақұлданған қолдау шараларының көлемі 2,7 млрд теңгені құрады, бұл 2024 жылмен салыстырғанда 10%-ға артық. Туробъектілерді салу кезінде шығындардың 10% өтеу көзделген. Өткен жылы 15 млрд теңге инвестиция салынса, 1,5 млрд теңгенің шығындарын өтеу бойынша қолдау шаралары мақұлданған. Жол бойындағы сервис объектілері бойынша 3,6 млрд теңгеге жоба жүргізіліп, өтеу 366 млн теңгені құрады», – деді спикер.
Бұдан бөлек, «Бәйтерек» холдингінің желісі бойынша кепілдік беру, субсидиялау және жеңілдетілген қаражат бөлу сынды қосымша қолдау көрсетіледі. 2025 жылы кепілдік беру құралы шеңберінде 137 жоба, субсидиялау шеңберінде 111 жаңа жоба, «Өрлеу» бағдарламасы бойынша жеңілдетілген қаржыландыру құралы аясында 201 жоба жүзеге асты.
Туризм саласының инвестициялық әлеуетін одан әрі арттыру бағытындағы негізгі құжат – Туризмді дамыту тұжырымдамасы. Қазір оған қатысты ұсыныстар жиналып, жаңартылған іс-қимыл жоспарының жобасы дайындалды. Құжат 6 негізгі бағыт бойынша 129 іс-шараны қамтиды. Іс-шаралардың көбі инженерлік-коммуникациялық және көліктік инфрақұрылымды дамытуға бағытталған. Осы блок шеңберінде Алакөл, Балқаш, Бурабай, Қапшағай, Катонқарағай, Кендірлі және Имантау-Шалқар сияқты негізгі курорттық аймақтарда 66 инфрақұрылымдық жобаны іске асыру жоспарланған.
Аталған курорттық аймақтарда 600 млрд теңгеден астам сомаға 136 инвестициялық жобаны іске асырылмақ. Осылайша, бюджеттен қарастырылған әрбір теңге тағы 3 теңге жеке инвестицияны қамтамасыз етеді.