Биыл жалпы егіс алқабы 623,3 мың гектарды құрайды, бұл былтырғы жылмен салыстырғанда 16,7 мың гектарға аз. Құрылымды түзету стратегиялық сипатқа ие және өндірісті әртараптандыруға, сондай-ақ ылғал көп қажет ететін дақылдардың үлесін қысқартуға бағытталған.
Атап айтқанда, бидайға – 145,1 мың гектар, арпаға – 187,8 мың гектар, жүгеріге – 23,3 мың гектар бөлінген. Майлы дақылдар – 40 мың гектар, мал азығына арналған дақылдар – 185 мың гектарды құрап отыр. Осылайша, өңір тұрақты әрі ресурсты үнемдейтін ауыл шаруашылығы моделіне басымдық беріп отыр.
Егіс құрылымын өзгерту Ислам даму банкінің қаржыландыруымен облыстағы 76 каналға жөндеу жұмыстарының жүргізілуіне байланысты. Жаңартылатын гидроқұрылымдардың жалпы ұзындығы 430 шақырымнан асады, суаратын жер алқабы – 51,4 мың гектар, Байзақ, Мерке, Сарысу, Талас және Шу аудандарын қамтиды. Жұмыс толық аяқталғанда өңір сенімді әрі тиімді су қамтамасыз ету жүйесіне ие болады, бұл аграрлық өндірістің әрі қарай дамуы үшін мағызды екені сөзсіз.
Өткен жылғы күзгі науқан ұйымдасқан түрде және агротехникалық талаптарға сәйкес жүргізілді: 200,3 мың гектар жерде жаздық дәнге дайындық жұмыстары жасалды, 145,1 мың гектарға қыстық дақылдар егілді. 2026 жылғы көктемде 325 мың гектарға жаздық дақылдар себілмек. Қажетті тұқымның 93%-ы, яғни 58 мың тонна дайындалған, бұл шаруашылықтар дайындығының жоғары екенін көрсетеді.
Егіс науқанына 10,5 мыңнан астам ауыл шаруашылығы техникасы тартылмақ. Сонымен қатар, машина-трактор паркін жүйелі жаңарту жұмыстары жалғасуда: 2026 жылы өздігінен жүретін техниканы жаңарту деңгейі 8%-ға жеткізілмек, бұл 476 жаңа техника деен сөз. Бұл еңбек өнімділігін арттыруға және егіс жұмыстарын жүргізу мерзімін қысқартуға мүмкіндік береді.
Сондай-ақ, 478,2 мың гектар жерге 109,7 мың тонна минералды тыңайтқыш енгізу жоспарланып отыр. Салыстырмалы түрде айтсақ, 2024 жылы 99,7 мың тонна енгізілген. Тыңайтқыш көлемін ұлғайту әр гектардан түсімді арттыруға және өңірдің азық-түлік қауіпсіздігін нығайтуға бағытталған.
Аграрлық салаға қаржылық қолдау «Кең дала-2» бағдарламасы аясында жүзеге асырылады. Шаруашылықтардан 4,6 млрд теңге көлемінде өтініш түскен, қазірдің өзінде оның 2,5 млрд теңгесі жеңілдетілген шарттармен берілді. Бұл ауыл шаруашылығы еңбеккерлеріне тұқым, тыңайтқыш және жанар-жағармай материалдарын уақытылы сатып алуға жол ашады.