Фото: Ашық дереккөз
«Самұрық-Қазына» ұлттық әл-ауқат қоры Qazaq Air әуе компаниясының бақылау пакетін (51%) вьетнамдық инвесторларға сату туралы келісімді аяқтады. Мәміле құны 1,02 миллиард теңгені құрады.
Қордың KASE-де жарияланған 2025 жылдың 9 айына арналған қаржылық есебіне сәйкес, акцияларды сату процесі 2025 жылдың 6 мамырында толық аяқталған. Келісімшарт нәтижесінде әуе компаниясының 49%-ы Sovico Group холдингіне қарасты Central Asia Aviation Holdings Limited компаниясына, ал тағы 2%-ы Kazasia Holdings Limited (иесі Тахир Фам) меншігіне өтті. «Самұрық-Қазына» қорында компанияның 49% үлесі қалды.
Әуетасымалдаушыны жекешелендіру процесі 2023 жылдың тамызында басталған болатын. Бастапқыда компания 10,2 миллиард теңгеге бағаланып, сатып алушы 38 миллиард теңге көлеміндегі қарызды өтеу міндетін алуы тиіс еді. Алайда, өтінімдердің болмауына байланысты конкурс екі рет өтпей қалды.
2024 жылдың мамырында Президент Қасым-Жомарт Тоқаев Қазақстан – Сингапур бизнес-форумында компанияның вьетнамдық инвесторларға сатылатынын ресми түрде жариялады. Кейінірек Көлік министрі Марат Қарабаев мәміле сомасы шамамен 2 миллиард теңге болады деп болжаған еді.
Сату бағасының 1 миллиард теңгеге дейін төмендеуі Қазақстанның бастапқыда компанияның 100% акциясын сатуды жоспарлап, кейін тек 51%-ын сату туралы шешім қабылдауымен байланысты болуы мүмкін.
Келісім шарттарына сәйкес, жаңа инвесторлар компанияның қарыздарын өтеп қана қоймай, әуе паркін жаңа ұшақтармен толықтыруға міндеттелді.