Алматыда су тасқынына қарсы қорғанышты күшейту бойынша ауқымды жұмыстар жүргізіліп жатыр. Жоба аясында Үлкен Алматы, Қарғалы, Сапожникова өзендері мен Қонаев атындағы Үлкен Алматы каналының жалпы ұзындығы 37,3 км болатын төрт су нысанын реконструкциялау және абаттандыру жүргізілуде. Сонымен қатар тағы екі өзеннің 17,5 км учаскесінде құрылыс-монтаж мен жобалау-сметалық құжаттаманы әзірлеу жұмыстары басталды. Осы шаралардың мақсаты су тасқынына төзімділікті арттыру, өзендердің экологиялық жағдайын жақсарту және іргелес аумақтарды абаттандыру. Жұмыстар кезең кезеңімен бекітілген мерзімдер мен құрылыс нормаларына сәйкес жүзеге асырылуда.
Ақмола облысында су тасқыны кезеңіне дайындық бойынша кешенді жоспар аясында инженерлік іс-шаралар белсенді түрде жүзеге асырылуда. Құжатта су тасқыны қаупін азайту және елді мекендер мен өңірдегі автожол учаскелерін қорғауға бағытталған 226 іс-шара көзделген. Негізгі жұмыстар су тасқынынан қорғайтын үйінділерді тұрғызу және нығайту, арналар мен арықтарды тазарту, кеңейту және тереңдету арқылы олардың өткізу қабілетін арттыру, сондай-ақ су өткізу құрылыстары мен көпірлерді ауыстыру және жөндеу сияқты бағыттарды қамтиды. Бүгінгі таңда облыста 167 іс-шара аяқталды, 37-сі белсенді іске асырылу сатысында, ал 22-сі бойынша дайындық жұмыстары жүргізілуде.
Павлодар облысында кешенді іс-шаралар жоспары мен инженерлік жұмыстар жоспары бекітілді. Су басу қаупін азайту мақсатында ұзындығы 30 км қорғаныш бөгендері мен біліктері нығайтылды, 2 км су бұру арналары салынды және жөнделді, 29 су өткізу құбыры орнатылып, қалпына келтірілді. ТЖД қызметкерлері су тасқыны қаупі бар елді мекендерге шығып, жағдайды бақылауда. Мониторинг кезінде ұшқышсыз ұшу аппараттары (дрондар) белсенді түрде қолданылып, нысандардың жағдайы жедел тіркеліп, атқарылған жұмыстардың сапасы бақыланады.
Солтүстік Қазақстан облысында ТЖД басшылығы облыс әкімімен бірлесіп Қызылжар ауданындағы қорғаныш бөгендеріне көшпелі тексеру жүргізді. Тепличное және Прибрежное ауылдарындағы объектілерге ерекше назар аударылды, онда бөгендерді нығайту және олардың су деңгейінің жоғарылауына төзімділігін бағалау жұмыстары жүргізілді. Қосымша жөндеу және қалпына келтіру іс-шараларын жүргізуді талап ететін проблемалық учаскелерге ерекше назар аударылды.
Барлық жұмыстар жауапты мекемелер мен қызметтердің қатысуымен жоспарлы түрде жүзеге асырылуда. Су тасқыны кезеңіне дайындыққа кешенді түрде қарау өңірлердегі су тасқынына қарсы қорғаныш деңгейін айтарлықтай арттыруға мүмкіндік береді.