2025 жылдың 8-ші қазанында Данна Қарағұсова Blue Origin компаниясының New Shepard NS-36 кемесімен суборбиталық ұшуға қатысып, Жер атмосферасынан тыс кеңістікке шыққан алғашқы қазақстандық әйел атанды.
New Shepard зымыраны Жер атмосферасы мен ғарыштың шартты шекарасы саналатын Карман сызығына дейін жетіп, экипажды штаттық режимде қайтадан жерге қондырды.
«Ғарышқа ұшқан сәт — өмірімдегі ең қатты қобалжыған кездерімнің бірі. Зымыранның көкке көтерілген сәті ерекше әсерлі болды. Денең әрбір қозғалысты сезеді, бірақ таңқаларлығы санаң соның бәріне қарамастан сабырлы болады. Салмақсыздық күйі дәл елестеткенімдей болды, алайда ішкі сезімдерімді сөзбен жеткізу мүмкін емес. Капсула сатыдан ажыраған сәтте, мен санамның бір бөлігі әдеттегі шектеулерден тыс кеткендей күй кештім. Жердегі сезімнің бәрі жоғалып, санамда тек шексіздік қалды. Әлемнің қаншалықты кең екенін көріп, өзіңнің кеңістіктегі кішкентай ғана бөлік екеніңді ұғасың. Есімде мәңгі қалатын бір көрініс: қара кеңістіктегі жарқыраған толық Ай және жұқа көгілдір атмосфералық қабаты бар Жер. Сол сәтте адамзаттың, ғалам алдында қаншалықты нәзік әрі кішкентай екенін терең түсінесің. Салмақсызданған кезіндегі алғашқы әрекетім — барлық аналарға арналған хатымды шығару болды. Бұл — менің анама және баласын арманына жетуде қолдайтын барлық әйелге арналған жеке құрметім. Өзім де анамын, тіпті балаңның арманы мүмкін емес болып көрінсе де, оған сеніп, қолдау көрсетудің қаншалықты маңызды екенін жақсы білемін. Бұл сапар мен соңғы жылдары өтіп келе жатқан жолдың табиғи жалғасы болды. Бұл — ішкі дүниеммен жұмыс және тұрақты негіз қалыптастыру жолы», деді Данна Қарағұсова.
Астронавттар ауылында Данна Қарағұсова ұлы Айтуармен бірге Қазақстанды таныстырып, экипаж мүшелеріне және Blue Origin қызметкерлеріне еліміздің мәдени мұрасы мен табиғаты туралы айтып берген.
«Адамдарға бұл атау қатты ұнады, онда бәрімізге ортақ бір рух бар еді: қозғалыс, ізденіс пен жылылықты қай жерде болсаң да сақтау қабілеті», дейді Данна.