Бас прокурор Берік Асылов өзінің әлеуметтік желідегі парақшасында еліміздегі бірқатар ауылдардың спиртті ішімдіктерді сатудан өз еркімен бас тартып жатқаны туралы жазба жариялады.
«Еліміз бойынша жүздеген ауылдар өз еркімен спиртті ішімдіктерді сатудан бас тартуда. Бұл — қарапайым халықтың саналы таңдауы. Тәртіп, денсаулық және балаларының болашағы үшін жасалған шешім. Мәселен, Маңғыстау облысының Маңғыстау ауданындағы бір ауылда тұрғындар ішімдікті сатудан өз еркімен бас тартып, бұл туралы бейнероликті әлеуметтік желілерде жариялады», деп жазды Бас прокурор.
Оның айтуынша, Маңғыстау, Ақмола, Жамбыл, Қарағанды, Атырау облыстарындағы бірнеше ауыл тұрғындары дүкендерден ішімдікті сатуды тоқтатқан.
«Иә, бұл елдегі барлық ауыл санын ескерсек, теңізге тамған тамшыдай көрінуі мүмкін. Бірақ бастысы — жағдайдың оң серпіні бар. Мұндай елді мекендер саны артып келеді. Адамдар сенім мен тұрақтылықты, тыныштықты жоғары бағалап, бір-біріне үлгі бола бастады. Бастама ауыл ақсақалдары мен Қоғамдық кеңестерден шығып, прокуратура, полиция және жергілікті әкімдіктердің тарапынан үйлестіру, алдын алу және қауіпсіздік қамтамасыз етілді», деді Берік Асылов.
Бұл ретте Берік Асылов ауыл кәсіпкерлерінің ерекше алғысқа лайық екендігін атап өтті. Себебі, олар жерлестерінің үнін естіп, дүкен сөрелерінен ішімдікті өз еркімен алып тастаған.
«Күмәнданғанмен, табыстары азайған жоқ. Керісінше, ауыл тұрғындары ішімдіктің орнына балаларға пайдалы азық-түліктерді жиі сатып ала бастады. Нәтижелер өздігінен көрініп тұр. Атап айтсақ, кейбір ауылдарда қылмыс мүлде жойылып, тұрмыстық жанжалдар тоқтады және жастар спорт пен саналы өмір салтын таңдай бастады», деді Б. Асылов.
Сонымен қатар, Бас прокурор тәртіптің қорқыныш арқылы емес, сенім мен саналы таңдау арқылы орнайтынын баса айтты.
«Бұл — «Заң және Тәртіп» қағидатының өмірдегі нақты көрінісі. Тәртіп қорқынышпен емес — сеніммен, жаза арқылы емес — саналы таңдаумен орнайды. «Заң мен Тәртіп — кемел демократияның іргетасы әрі құқықтық мемлекеттің негізі», – деп Мемлекет басшысы атап өткен еді. Біз болашаққа деген қамқорлық, қоғамдық келісім және заңға құрметке негізделген әрбір бастаманы қолдаймыз», деп түйіндеді Бас прокурор.
Айта кетейік, ресми статистика бойынша биылғы жылдың алғашқы үш айында алкогольдік мас күйінде жасалған қылмыстар саны азайған.