Кейінгі кездері еліміздегі бірқатар мейрамхана, кафелер мен дәмханалардың иелері ауызашар мәзірінің бағасын өте жоғары ұсынып, халық арасында түсінбеушіліктің туындауына себепші болуда. Осы ретте Қазақстан мұсылмандары діни басқармасы ауызашар беру әдебіне қатысты ресми мәлімдеме жасады, – деп хабарлайды Aikyn.kz.
Қазақстан мұсылмандары діни басқармасы мейрамхана, кафелер мен тамақтану орындарының иелерін халыққа қолжетімді әрі қарапайым ауызашар мәзірін ұсынуға шақырды.
– Асыл дініміз ауызашар дастарқанында аста-төк ысырапқа жол беруге, дастарқан жасауда бәсекелесуді құптамайды. Ондай әрекет сауапқа емес, күнәға жетелейді. Ауызашар дастарқаны қарапайымдылыққа негізделуі тиіс. Қасиетті Құранда: «… ішіңдер, жеңдер, алайда ысырапқа жол бермеңдер. Өйткені Алла ысырап етушілерді жақсы көрмейді» делінген («Ағраф» сүресі, 31-аят), – деп мәлімдеді ҚМДБ.