Қызылорда облысының ірі аудандарының бірі – Шиеліде халықтың өмір сүру сапасын арттыруға бағытталған іргелі бастамалар кезең-кезеңімен жүзеге асуда. Бұл жұмыстар аясында әлеуметтік инфрақұрылым жаңғырып, жаңа нысандар пайдалануға берілуде. Жақында ауданға республикалық және жергілікті бұқаралық ақпарат құралдары өкілдері арнайы іссапармен барып, өңірде жүзеге асып жатқан жобалармен танысты.
Баспасөз туры барысында журналистер алдымен биыл қаңтарда ашылған «Руханият орталығына» барды. 1,6 миллиард теңге көлемінде қаржы жұмсалған бұл орталық – аудан тұрғындарының мәдени әрі рухани қажеттіліктерін өтеуге бағытталған заманауи кешен. Мұнда түрлі шығармашылық үйірмелер, интелектуалдық кездесулер, тәрбие мен даму бағытындағы іс-шаралар өткізіледі. Екі қабатты ғимарат болашақта ауданның мәдени тынысын аша түсер маңызды мекенге айналмақ.
Одан кейінгі аялдама – қазіргі таңда құрылысы қарқынды жүріп жатқан Оқушылар үйі мен Өнер мектебі болды. 200 оқушыға арналған білім ордасы мен 50 орындық өнер мектебі қыркүйек айында толық іске қосылады деп жоспарланып отыр. Бұл нысандар аудан балалары үшін қосымша білім мен шығармашылық дамуға үлкен серпін бермек.
Бұдан бөлек, журналистер «Ауыл аманаты» жобасы аясында құрылған бизнес-инкубатор жұмысымен танысып, аудандық аурухана жанынан салынудағы МРТ орталығы мен 30 төсектік жұқпалы аурулар бөлімшесінің құрылысын көрді. Сонымен қатар, аудан орталығындағы спорт кешені мен күрделі жөндеуден өтіп жатқан Ы.Алтынсарин атындағы мектептің жаңару барысы да назардан тыс қалмады.
Тур аясында негізгі көшелерді, қоғамдық алаңдарды, вокзал маңын абаттандыру бағытындағы атқарылып жатқан жұмыстар да таныстырылды. Бұл өзгерістердің барлығы ауданның келбетін жаңартып қана қоймай, тұрғындарға жайлы өмір сүру ортасын қалыптастыруға бағытталған.
Жалпы, Шиелі ауданындағы жүйелі жобалар мен инфрақұрылымдық жаңғыртулар – өңірдің әлеуметтік-экономикалық дамуына серпін беретін нақты қадамдар. Алдағы уақытта да бұл бағыттағы жұмыстар жалғасын тауып, аудан халқының әл-ауқатын арттыруға ықпал ететіні анық.
