Өскемендік параспортшы халықаралық жарыстарға қатысып, жүлдемен оралса да оған тиесілі сыйақы берілмегенін айтып, сотқа жүгінген.
Мүмкіндігі шектеулі спортшы пара-армрестлинг бойынша халықаралық чемпионаттарда ШҚО Дене шынықтыру және спорт басқармасының спорт клубы атынан шығып жүрген. Айтуынша, ол 2022 және 2023 жылдары Анталья және Алматы қалаларында өткен әлем чемпионаттарында жүлделі орындар иеленген. Сол кезде оның іссапар шығыны ғана төленіп, ақшалай сыйақы берілмеген екен. Соттың баспасөз қызметінің хабарлауынша, Спорт және туризм министрлігі құжаттарды тапсырудың ресми мерзімінің сақталмауын және жаңа нормативтік актіде көзделген 20 елден қатысушылардың жеткіліксіздігін сылтауратып, спортшыға ақшалай сыйақы төлеуден бас тартқан.
Сот министрліктің бұл әрекетін заңсыз деп тапты. Себебі, 2022 жылы чемпионат кезінде бұл талап болғанын ескере отырып, оны қолдануға да мүмкін еместігін жеткізді. Сондай-ақ сот қолданыстағы заңға тәуелді актілерде паралимпиадалық емес спорт түрлері бойынша спортшыларға көтермелеу төлеуге тікелей тыйым салынбағанын атап өтті.
Енді министрлік оған ақшалай сыйақысын беруі керек. Өйткені спортшы ең алдымен мемлекет мүддесі үшін жарыстарға қатысқан. Екіншіден, ақшалай сыйақы төлеуден бас тарту Конституцияға, халықаралық міндеттемелерге және кемсітушілікке жол бермеу қағидаттарына қайшы. Сондықтан сот спортшының талаптарын қанағаттандырып, министрлікті ақшалай сыйақыны заңда көзделген тәртіппен төлеуге міндеттеді.
Сот шешімі әлі заңды күшіне енген жоқ.