Бүгін облыс жастары Тараз қаласы Әулиеата ауданы 9 шағын ауданда «Таза аула» экологиялық акциясын ұйымдастырды. Шараға қатысушылар тұрғындарымен бірге аулаға тазалық жұмыстарын жүргізді.
«Белсенділер тарапынан экологиялық акция шаралары тұрақты ұйымдастырылып келеді. Акцияға қала тұрғындарының атсалысуы бізді қуантады. Біз табиғатты аялауды, қоршаған ортаны қорғауды өмір салтымызға айналдыруымыз қажет. Әрбір отырғызылған ағаш, әрбір жиналған қоқыс – бұл туған жерге деген махаббаттың көрінісі. Тазалық – тәртіптің, мәдениеттің, өркениеттің белгісі. Тазалықты әр үйден, әр көшеден, әр жүректен бастауға шақырамын» – деді Тараз қалалық жастар орталығы директорының орынбасары Камал Тұрлыхан.
Осындай бағыттағы іс-шаралар облыстың барлық аудандарында да өткізілді.
Атап айтқанда, Байзақ ауданы Сарыкемер ауылында Суханбаев атындағы саябақта, Қордай ауданы Қордай ауылында Жасыл саябағында, Меркі ауданында «Меркі» тау шатқалында, Т. Рысқұлов ауданы Құлан ауылында «Жеңіс» саябағында тазалық жұмыстары жүргізілді.
Облыс көлемінде іске асып жатқан көктемгі абаттандыру және санитарлық тазалық айлығы аясында «TazaLike», «Таза аула», «Таза қала» «Үлгілі аула» конкурстары өткізілуде.
Жамбыл облысында тұрғындардың тазалық жөнінде жергілікті атқарушы органдарға «Таза Қазақстан» акциясының ақпараттық сервисі арқылы телеграмм-ботпен өтінім беруге мүмкіндігі бар. Телеграмм-бот ашылғалы бері жалпы 542 өтінім түскен. Жыл басынан бері акция аясында 803,8 шақырым каналдар мен арық жүйелері, 79,2 мың тұрғын үй аулалары мен 2,7 мың шақырым көшелер тазаланып, 6,1 мыңнан тоннадан аса қоқыс шығарылды. 286,9 мыңға жуық ағаш отырғызылып, 641,1 мың шаршы метр саябақ пен сквер аумақтары тазартылды.