Қызылорда облысында Полиция департаментінің бастамасымен киберқылмыспен күрес орталығы ашылды.
Ашылу салтанатына облыс әкімінің бірінші орынбасары Данияр Жаналинов, облыс прокуроры Ризабек Ожаров, Сыбайлас жемқорлыққа қарсы іс-қимыл агенттігінің Қызылорда облысы бойынша департаментінің бастығы Қуаныш Ахметқалиев, Полиция департаментінің бастығы Серік Ергешов пен өзге де құқық қорғау саласы басшылары қатысқан орталықтың ерекшелігі – интернет-алаяқтардың құрбаны болған азаматтардың арызы бір жерден қабылданып, бір жерден тергелетін болады. Бұрын арызды қабылдау, тергеушіге тапсырудың өзі біршама уақыт алса, енді оның бәрі жедел орындалып, ақша айналымына дереу тосқауыл қойылады.
«Осы арқылы біз қылмыстың санын азайтамыз. Ең жақсы амал – алдын алу. Сондықтан, халыққа интернет алаяқтардан сақтану жолдары барынша кең түсіндірілуі керек», деді Полиция департаментінің бастығы Серік Ергешов.
Орталық интернет-алаяқтыққа қарсы күресті күшейтіп, қылмыстың алдын алумен қатар азаматтардың полицияға деген сенімін нығайта түсуге сеп болмақ.
Интернет алаяқтықтың алдын алудың ең тиімді шарасы азаматтардың ақпараттық және құқықтық сауаттылығын арттыру. Бұл ретте Қызылорда облысының Полиция департаменті халықты ақпараттандыру бойынша ауқымды жұмыстар жүргізіп жатыр. Осының арқасында аймақта аз уақыт ішінде алаяқтықтың 60-тан астам дерегі ашылды.
Мұрат ЖЕТПІСБАЕВ,
Фото: ашық дереккөз