Көлік министрлігі мен «ҚазАвтоЖол» ұлттық компаниясы республикалық маңызы бар автожолдардың сапасын арттыруға бағытталған «Халықтық бақылау» ауқымды жобасын іске қосты. Енді әрбір азамат елде салынып жатқан күрежолдың жай-күйін бағалай алады.
Бастама азаматтарды қоғамдық бақылау жұмыстарына шақыру арқылы жолдардың сапасын жақсартуды көздейді. Жоба жол инфрақұрылымы жағдайына бейжай қарамайтын белсенді азаматтардың арасында ашық алаң болмақ. Тұрғындардың белсенді қатысуымен жолдағы ақаулар дер кезінде анықталып, оларды жоюға, сондай-ақ халықтың шағымдары мен ұсыныстарына жедел әрекет етуге мүмкіндік туады. Бұл өз кезегінде жұмыстың ашықтығын арттыруға ықпал етеді.
Әрбір азамат жол сапасын арттыруға өз үлесін қоса алады. Ол үшін 1403 нөмірі арқылы байланыс орталығына хабарласып, өтінім беру жеткілікті. Өтінім беру кезінде аты-жөні, байланыс деректері, тұрғылықты өңірі мен елді мекені көрсетілуі қажет. Жоба аясында құрылыс, қайта жаңғырту және жөндеу жүргізіліп жатқан автожол нысандарына тұрақты түрде шығу жоспарланған. Нысандарға шығу кестесі мен жоба туралы толық ақпарат компанияның ресми сайтында (www.qaj.kz.) жарияланған.
Қазір елімізде көлік инфрақұрылымын дамыту мен жаңғыртудың барлық негізгі бағыттарын қамтитын ауқымды жол-құрылыс маусымы басталады. Жоспар бойынша жыл соңына дейін 8800 шақырым автомобиль жолдарында түрлі жөндеу жұмыстары жүргізіледі. Оның 2100 шақырымында құрылыс және қалпына келтіру, 460 шақырымында күрделі жөндеу, 6300 шақырымында орташа жөндеу жұмыстары атқарылады.