Жаңаарқа ауданындағы «Uly Dala Co» ЖШС қой етін экспортқа шығара бастады. Серіктестіктің ет өңдейтін комбинатынан жақында Қатар еліне 2,5 тонна қой еті экспортқа жіберілді.
Комбинат ашылған кезде Қатармен арада ет экспорттау туралы келісімшарт жасасқан болатын. Соған орай өткен жылдың желтоқсан айында 2 тонна қой етін экспортқа шығарып, енді міне жыл басында екінші кезектегі өнімін жөнелтті. Серіктестік бұдан бөлек, алдағы уақытта Иорданияға жылына 500 тонна ет жіберуді жоспарлап отыр.
Мемлекет басшысы Қасым-Жомарт Тоқаев өткен жылғы халыққа арнаған Жолдауында агроөнеркәсіп кешенін дамытуға қатысты міндеттерге тоқтала келіп: «Ауыл тұрғындарына өз өнімдерін өңдеуге және сатуға мүмкіндік беретін инфрақұрылым құру өте маңызды» деген еді. «Uly Dala Co» ЖШС қолға алып жатқан жобалар осы талапқа толық сай келетінін бағамдауға болады.
Ақтайлақ елді мекенінде орналасқан серіктестіктің ет комбинаты өткен жылдың күз айына қарай ашылды. Ет өнімдерін салқындату қоймалары, тоңазыту камералары, зертханасы, мал сою цехы және консерві цехы сияқты технологиялық бірегей желілерді қамтыған жаңа кәсіпорында қазір 18 адам еңбек етеді. Комбинаттың тәулігіне 4 тоннаға дейін ет өңдеп, 3 мыңға жуық бұқтырылған ет қалбырын шығаратын мүмкіндігі бар. Кәсіпорынның консерві цехында бұқтырылған еттің үш түрі – қой, сиыр, жылқы еттері қалбырланады.
Алдағы уақытта етпен үздіксіз қамтамасыз ететін мал бордақылау алаңын іске қосу да ойластырылған. Қаражал қаласының сыртындағы Шалғия алқабындағы 100 мың гектардай жайылымдық жерінде мал шаруашылығын дамыту бағытындағы жұмыстар қолға алынған. Шаруашылықта 1 500 жылқы, 2,5 мың қой түлігі бағылып жатыр.
Амандық РАХҰЛЫ,
Ұлытау облысы