Қасым-Жомарт Тоқаевтың жарлығымен Мұса Сайранбайұлы Әбдірайым «Ерлігі үшін» медалімен наградталды. Бұл туралы Ақорда хабарлады.
«Мемлекет басшысының Жарлығымен қиын-қыстау жағдайда көрсеткен ерлігі мен жанқиярлығы үшін Мұса Сайранбайұлы Әбдірайым «Ерлігі үшін» медалімен наградталды», — делінген президент хабарламасында.
Еске сала кетейік, бүгін Алматыдағы әуежайда ер адам инспекторды шашынан ұстап, пышақпен қорқытқан. Әуежайдың баспасөз қызметінің хабарлауынша, 7 минуттан кейін құқық бұзушыдан полиция қызметкерлері мен әуежайдағы азаматтардың көмегімен суық қаруы алынған. Қылмыскерді ұстауға көмектескен ер адамның батылдығын Президент ерекше атап өтіп, оған мемлекеттік наградаға ұсынуды тапсырды.
Кейін «Жігіттер» квартетінің әншісі Бағлан Әбдірайымов Instagram желісінде видео бөліскен. Оның әуежайда жұмыс істейтін қызды құтқарған ер адам ағасы екенін жазған болатынбыз.