Олжас Бектенов ESTA Construction компаниясымен екі апта ішінде құны $1,3 млрд болатын тыңайтқыш зауытының құрылысы бойынша Инвестициялар туралы келісім жасауды тапсырды.
ҚР Премьер-министрі Олжас Бектенов ESTA Construction компаниясының бас директоры Мұстафа Топракпен кездесу өткізді. Жиында Карбамид пен аммиак өндіретін зауыт құрылысына қатысты мәселелер талқыланды.
Жоба Маңғыстау облысында «Құрық» теңіз порты маңында ірі газ-химия өндірісін құруды көздейді. Зауыттың орны Каспий теңізі арқылы өнімді экспорттауға оңтайлы жағдайларды қамтамасыз ету үшін логистикалық артықшылықтарды ескере отырып таңдалды. Зауыт жылына 700 мың тоннаға дейін карбамид және 42 мың тонна аммиак өндіреді, бұл тыңайтқыштар импортына тәуелділікті азайтып, еліміздің ауыл шаруашылығы саласын қосылған құны жоғары өніммен қамтамасыз етуге мүмкіндік береді. Жобаны іске асыру барысында 3 мыңға дейін маман тартылып, құрылыс нәтижесінде 400 тұрақты жұмыс орны ашылады.
Бүгінде елімізде тыңайтқыштардың үш түрін өндіру жолға қойылған: аммиак селитрасы, аммофос және аммоний сульфаты. Сонымен қатар сұраныс 3,2 млн тонна ғылыми қажеттілік кезінде отандық қуаттар сұраныстың 56%-ын қамтамасыз етіп, жылына 1,8 млн тоннаға жуық тыңайтқыш өндіреді.
Олжас Бектенов өзімізде карбамид өндірісін құру импортқа тәуелділікті азайтуға және азық-түлік қауіпсіздігін нығайтуға мүмкіндік беретінін баса айтты.
«Мемлекет басшысы еліміздің агроөнеркәсіп кешенін дамытуға үлкен көңіл бөлуде. Өткен жылы өнім жинау бойынша рекордтық көрсеткішке қол жеткізілді. Үкімет егіншілерді қолдауға 700 млрд теңге бөлді. Маңызды мәселе – сапалы әрі қолжетімді минералды тыңайтқыштармен қамтамасыз ету. Сондықтан сіздің жобаңыз карбамидке ішкі сұранысты қамтамасыз ету, сондай-ақ оны импорттау тұрғысынан біздің қызығушылығымызды тудырып отыр», деді Олжас Бектенов.
Сонымен қатар кездесу барысында ауыл шаруашылығы тауарын өндірушілерді мемлекеттік қолдау шаралары талқыланды.
«Қазіргі уақытта Қазақстанда тыңайтқыштар құнының 60%-на дейін жабатын субсидиялау бағдарламасы жұмыс істейді, 2024 жылдың наурызынан бастап аванстық субсидиялау тетігі енгізілді, соның арқасында қаражат өнімнің өзіндік құнын төмендету үшін өндірушілерге алдын ала қаражат аударылады. Өткен жылы бұл мақсаттарға 46,4 млрд теңге бөлінді, 2025 жылға 35 млрд теңге қарастырылды», делінген хабарламада.
Кездесу қорытындысы бойынша уәкілетті мемлекеттік органдарға барлық рәсімді жеделдетілген тәртіппен жүргізу және екі апта ішінде ESTA Construction компаниясымен ірі инвестициялық жобаны іске асыруды бастайтын Инвестициялық келісім жобасын қол қоюға енгізу тапсырылды.
Фото: Үкіметтің баспасөз қызметі