Қызылорда облысы бойынша экология департаменті 2024 жылы қоршаған ортаны қорғау саласында 57 субъектіге бақылау шараларын ұйымдастырды.
Оның ішінде 19-ы профилактикалық бақылау және қадағалау, 37 жоспардан тыс және 1 талаптарға сәйкестік тұрғысынан тексерулер.
Бақылау шараларының нәтижелерімен 84 экологиялық заңнама талаптарын бұзу фактілері анықталып, кемшіліктерді жою үшін 82 нұсқама берілген. Бұл туралы Қызылорда облысы бойынша экология департаменті басшысының орынбасары Алмас Искаков хабарлады.
— Департаментпен есепті кезеңде табиғат қорғау іс-шараларының орындалуына, қоршаған ортаға эмиссияларды төмендетуге, табиғат пайдаланушылардың қоршаған ортаға жауапкершілікпен қарауын қалыптастыру және ҚР Экологиялық заңнамасын бұзу деректерінің алдын-алуға ерекше ден қойылды. Сонымен қатар, департаментпен 2024 жылға бекітілген кестеге сәйкес 69 субъектіге бармай профилактикалық бақылау шаралары жүргізіліп, анықталған заңбұзушылықтарды жою жөнінде ақпараттық хаттар жолданып, бұзушылықтар толығымен жойылды. Сондай-ақ, есепті кезеңде қоршаған ортаның авариялық ластануының 12 дерегі орын алған. Департаменттің мемлекеттік экологиялық бақылау қызметі «Байқоңыр» кешеніндегі объектілерді де қамтиды. «Байқоңыр» кешенінің объектілерінде тексеру жүргізу жоспарына сәйкес қоршаған ортаны қорғау саласындағы мемлекеттік экологиялық бақылауды жүзеге асыру шеңберінде Департаментпен 2024 жылы 12 объектіге жоспарлы тексеріс жұмыстары жүргізіліп, анықталған 9 заң бұзушылықтарды жою жөнінде ұйғарымдар беріліп, толығымен орындалды. Байқоңыр қаласы мен Ақай ауылдық округі мен Төретам кентінің маңындағы қалдықтар мәселесі өзекті мәселелердің бірі болып табылады. Аталған қалдықтарды жою мәселесі Қазақстан-Ресей арасындағы Байқоңыр кешені жөніндегі 7 үкіметаралық комиссия отырысында қаралды. Нәтижесімен Байқоңыр қаласы әкімшілігімен Жол картасы бектілді. Оның аясында бүгінгі күнге 15,3 мың м3 қалдықтар жойылды,- деді Алмас Илиясұлы.