Облыс әкімі Нұрлыбек Нәлібаев Арал ауданына жұмыс сапары кезінде жұртшылықпен кездесіп, құқық қорғау органдарының басшыларымен бірге тұрғындарды жеке қабылдады. Азаматтарға көтерген мәселелерінің шешіміне қатысты заң аясында тиісті түсіндірме берілді.
«Оқушылар үйінде» өткен жеке қабылдауға 91 азамат келді. Олар тұрғын үй, жолды асфальттау, балабақша салу, салық, декларация тапсыру, жұмысқа орналасу, мектеп салу, сор көлдерді көму, тағы басқа мәселелерді көтерді.
«Мергенсай» ауылының тұрғынын «Арал-Жалаңаш» автожолын асфальттау мәселесі толғандырады. Аймақ басшысы аталған автомобиль жолына қаржы бөлінгенін, жөндеу жұмыстары сәуір айында басталатынын айтты.
Арал қаласының тұрғыны «Шаруашылыққа қажетті ұнтақтар шығару» жобасын таныстырып, кәсібіне қолдау сұрады. Облыс әкімі тың жобаға жан-жақты қолдау болатынын жеткізді.
Сонымен қатар, аймақ басшысы ауданда құрылыс салатын мердігер мекемелердің басшыларын қабылдап, нысандардың сапасына баса мән беруді, жұмысты уақытылы аяқтауды тапсырды.
Қабылдауда тұрғындар құқық қорғау органдары басшыларына өз сауалдарын қойып, заңдық тұрғыда кеңес алды. Көтерілген мәселелер заңда белгіленген тәртіппен, кезең-кезеңімен шешіледі. Аймақ басшысы осы орайда жауапты сала басшыларына бірқатар тапсырма берді.
Сондай-ақ,облыс әкімі еңбек ардагерлерімен және зиялы қауым өкілдерімен кездесіп, өңірдің әлеуметтік-экономикалық дамуындағы кейбір мәселелерді талқылады.