ҚР Парламенті Сенатының депутаты Нұртөре Жүсіп Мемлекет басшысы Қасым-Жомарт Тоқаевтың Үкіметтің кеңейтілген отырысында айтқан мәселелері туралы Facebook әлеуметтік желісінде пікірін білдірді.
Нұртөре Жүсіп Мемлекет басшысының төрағалығымен өткен Үкіметтің кеңейтілген отырысын жылдың басындағы аса қажет жиын деп атады.
«Елдегі экономикалық жағдай сарапқа салынды. Мемлекет басшысы түйінді сөзінде Үкіметтің және басқа да құзырлы органдардың жақын арадағы негізгі міндеттеріне тоқталды. Біздің Үкіметке жетпей жатқан бір іс болса — осы. Әр жер, әр өңірде нәтижелі жұмыс бар. Бірақ мәселеге тұтас қарау, ортақ шешімдер қабылдау, министрліктер жұмысын бірлесе отырып үйлестіру жағы жетіспейді.Мұны Мемлекет басшысы қадап тұрып айтты», деді Сенат депутаты.
Сенатордың пікірінше, сырттай қарасаңыз Үкімет жаппай жұмылып жұмыс істеп жатқан сияқты. Апта сайын Үкімет отырысы өтеді. Премьер-министр тапсырма береді. Шапқылап жүрген бір адам. Ал нәтиже қандай? Берілген тапсырма орындалды ма? Орындалмаса неге орындалмады? Сұрау жоқ секілді.
«Тапсырмалар бар. Тиянақты орындау жағы аз. Сұрау, бақылауға алу, өз міндеттерін дұрыс атқармағандарды жауапқа тарту жағы байқалмайды. Осы қалыппен кете берсек, бәрі жәй әшейін сөз түрінде қалады. Сондықтан «белбеуді бууға бел керек»! Жедел шешім қабылдауға Ер керек! Жауапкершілікті өз мойнына ала білу деген талап орнықса дейміз. Осы уақытқа дейін экономиканы дамыту үшін «кластер керек» дедік. Одан кейін «инновация керек» дедік. Сосын «индустриализация керек» дедік. Қанша миллиард қаржы кетті соның бәріне!Жауап берген біреу бар ма?», деп жазды Нұртөре Жүсіп.
Үкіметтің кеңейтілген отырысында Президент мемлекеттік қызметшілердің құлықсыздығы және жауапкершілік алудан тайсалуы келісу рәсімдері мен шешім қабылдаудың тым ұзаққа созылуына себеп болып отырғандығын ашық айтты.
Бұл ретте сенатор құлықсыздықтан қалай құтыламыз? Жауапсыздықты қалай реттейміз? Дербес шешім қабылдауға қашан көшеміз? Үкіметтің тағдыры ең алдымен осы сауалдарға жауап табуына тікелей байланысты болады-ау деп түйіндеді.
Фото: Ашық дереккөз