Дінмұхамед Қонаевтың ұзақ жылдар бойы бірінші көмекшісі болған Дүйсетай Бекежановтың қызы әкесінің қамауға алынуы мен жұмбақ өліміне қатысты көлемді жазба жариялады. Ондағы ең назар аударарлық тұс — Бекежанов қайтыс болардан бірнеше күн бұрын Нұрсұлтан Назарбаевпен жеке кездесуге дайындалған, деп хабарлайды Democrat.kz сайтына сілтеме жасап.
Қызының айтуынша, әкесін Назарбаев жеке өтініші бойынша қабылдауға тиіс болған. Дүйсетай Бекежанов сол кезде президенттің көмекшісі қызметін атқарған Нұртай Әбіқаевпен телефон арқылы сөйлесіп, кездесудің күні мен уақытын келіскен. Алайда жоспарланған кездесу жүзеге аспады: Бекежанов көп ұзамай өмірден өтті.
Ресми қорытындыда оның өліміне көлемді инфаркт себеп болғаны көрсетілген. Бірақ отбасы мәйітті қоштасуға әкелген кезде «уланудың белгілерін» байқағанын алға тартып отыр. Қызы әкесінің көп құпияны білгенін және бірқатар ықпалды адамдарға қолайсыз болғанын жазады. Бұл — отбасы ұсынған нұсқа, ол ресми тергеу қорытындысымен дәлелденбеген.
Жазбада әкесі қайтыс болғаннан кейін көңіл айтуға Назарбаевтың жақын серіктерінің бірі келгені де айтылады. Әлгі адам Бекежановтың туыстарына бұл істі қайта көтеріп, «шу шығармауға» кеңес берген көрінеді. Марқұмның қызы мұны жоғарыдан берілген ескерту ретінде қабылдаған.
Дүйсетай Бекежанов 22 жыл Қонаевтың жанында еңбек етіп, оның бірінші көмекшісі әрі «оң қолы» болған. Қонаевтың өзі де Бекежанов пен Асанбай Асқаровтың жазасын әділетсіз деп бағалап, «екеуі де мен үшін азап шегіп жүр» деген екен.
Бекежанов 1987 жылғы 17 наурызда жұмыс орнынан әкетіліп, кейін қызметтік өкілеттігін асыра пайдалану және пара алды деген айыптармен сегіз жылға сотталған. Отбасының сөзінше, айыптардың бірі — Алматыдағы көрмеден ақшасын төлеп сатып алған екі балалар кереуеті мен екі мектеп партасына қатысты болған.
Ол 1990 жылы бостандыққа шыққанымен, арада сегіз ай өткенде, 1991 жылғы 31 тамызда көз жұмған. Енді оның қызы әкесінің Назарбаевпен қандай мәселені талқыламақ болғанын және бұл кездесудің кімдерге тиімсіз болғанын ашық сұрақ ретінде көтеріп отыр.
Әзірге Нұрсұлтан Назарбаевтың өкілдері немесе жазбада аты аталған өзге тұлғалар бұл мәлімдемелерге қатысты пікір білдірген жоқ. Сондықтан улану және кездесуге кедергі жасалды деген тұжырымдарды дәлелденген тарихи факт емес, марқұмның отбасы жариялаған нұсқа ретінде қарастырған жөн.