Оның негізгі бағыттары: ұшқышсыз технологиялар, роботтандырылған жүйелер, ЖИ және киберқауіпсіздік технологиялары. Осы бағыт аясында мемлекет, IT-компаниялар, инженерлік қоғамдастық, ғылыми ұйымдар, техникалық жоғары оқу орындары, стартаптар және жас әзірлеушілер арасындағы өзара іс-қимылды қамтамасыз ететін Defence Tech офисі жұмыс істейді.
Сондай-ақ ол SHAIQAS 2026 чемпионаты өткізіліп жатқанын хабарлады. Жарысқа 1-15 маусым аралығында тіркелуге болады.
«Қатысушылар дрондарды жинап ұшырады, барлау жасайды, координаттарды жібереді. Сондай-ақ роботтарды құрастырып, киберқауіпсіздік бағыты бойынша бақ сынасады. Соңғы кезеңде инженерлер тактикалық жарыс аясында атуды, спорт пен медицинаға қатысты операциялар жүргізеді. Жүлде қоры – 10 млн теңге. Тамыз айында финал өтеді», – деді спикер.
Қорғаныс министрлігі жасанды интеллект технологияларын енгізуге ерекше көңіл бөлуде. Цифрландыру аясында азаматтардың әскермен өзара іс-қимылының бірыңғай цифрлық платформасы – myarmy.kz порталы іске қосылды.
Сондай-ақ азаматтармен өзара іс-қимылды жетілдіруге және басқару тиімділігін арттыруға бағытталған цифрлық шешімдерді дамыту жұмыстары жалғасуда. Олардың қатарында «ARMIA.KZ» ақпараттық сервисі, «AI-Сұлу» әскерибот-психологы, ішкі нормативтік құжаттар бойынша навигация жасайтын чат-бот, GPT-ге ұқсас интеллектуалды көмекші бар.
Қызмет өткеру, келісімшарттар, жеңілдіктер, демалыстар және іссапарлар туралы деректерге онлайн режимде қол жеткізуді қамтамасыз ететін әскери қызметшінің бірыңғай цифрлық жеке кабинеті – «Әскери e-Gov» сервисі іске асырылуда. Бұл сервис кадрлық процестердің ашықтығын арттырып, ақпараттың қолжетімділігін қамтамасыз етеді және қажетті мәліметтерді алу үшін бөлімшелерге жеке жүгіну қажеттілігін азайтады.