Вице-министр атап өткендей, 2026 жылдың 15 сәуірінен бастап «Қазақстан халқына» қорының қолдауымен AI-Sana бағдарламасының екінші кезеңі басталды. ЖИ дамыту жөніндегі кеңестің мүшесі Пол Ким әзірлеген бастама аясында 100 мың студент AI-кәсіпкерлік негіздерін үйреніп, өз жобаларын бастады. Бұдан әрі командалар құру, AI-шешімдерді дайын өнім деңгейіне дейін жеткізу, сондай-ақ оның аясын кеңейту үшін Astana Hub және QazInnovations-пен бірлесіп, оларды инкубациялау мен акселерациялау көзделген.
«Бағдарламаның екінші кезеңі – ЖИ-ді базалық меңгеруден технологияларды практикалық қолдануға және жеке жобаларды әзірлеуге өтудің негізгі қадамы. Оны іске асыруға Стэнфорд университеті мен Массачусетс технологиялық институтының өкілдерін, Кремний алқабының венчурлық қорларын және халықаралық бизнес-мектептерді қоса алғанда, жетекші халықаралық сарапшылар тартылды. 2-кезең материалдарын дайындау Пол Кимнің жетекшілігімен Zemex Inc. (АҚШ) компаниясының қатысуымен жүзеге асырылады. Бағдарламаға Stanford University, Carnegie Mellon University, UC Berkeley, Johns Hopkins SAIS, Georgetown University, Boston University және басқа да халықаралық ұйымдардың өкілдері қатысуда», – деп хабарлады спикер.
AI-Sana бағдарламасын іске асыруға 63 сарапшы, соның ішінде халықаралық мамандар, Стэнфорд және CMU профессорлары, сондай-ақ 29 инвестор мен венчурлық қор тартылды. Жобаның ерекшелігі – Стэнфорд университетінің әдістемесі мен SMILE (Stanford Mobile Inquiry Learning Environment) платформасын енгізу болды. Бұл платформа жобамен жұмыс істеудің барлық кезеңдерін – идеяны қалыптастырудан бастап, нәтижелерді AI-бағалауды қолдана отырып дайын шешімді таныстыруға дейін сүйемелдеу үшін пайдаланылады.
Бағдарлама қорытындысы бойынша қатысушылар машиналық оқыту модельдерін әзірлеу мен оқытуды, Python, Google Colab және Jupyter-мен жұмыс істеуді, үлкен тілдік модельдер мен API-ді қолдануды, сондай-ақ MVP-прототиптерді жасау, стартап-идеяларды валидациялау және технологиялық жобаларды іске қосу дағдыларын меңгереді.
AI-Sana-ның алғашқы нәтижелерінің бірі – студенттердің экономиканың түрлі саласы үшін 300-ден астам ЖИ-агенттер мен цифрлық шешімдерді әзірлеуі болды. 180-нан астам жоба білім беру саласында жүзеге асырылды. Бұдан бөлек, AI-әзірлемелер денсаулық сақтау, ғылым, ауыл шаруашылығы, қаржы, логистика, ақпараттық қауіпсіздік және энергетика салалары үшін де жасалуда. Бұл студенттердің AI-құзыреттіліктерді тек меңгеріп қана қоймай, оларды нақты салалық міндеттерді шешу үшін қолданып жатқанын көрсетеді.