Таразда автосалонның бұрынғы менеджері ірі көлемдегі алаяқтық үшін сотталды, деп хабарлайды Бас прокуратураның баспасөз қызметі.
Қаланың 25 жастағы тұрғыны автосалонда сату бөлімінің басшысы болып жұмыс істеп жүріп, клиенттер мен жұмыс берушісін алдаған. Тергеу деректеріне сәйкес, ол клиент әйелге құны 90 млн теңге тұратын көлігін жаңасына ауыстырып беруге уәде етіп, автокөлікті сатып жіберіп, қаражатты өз пайдасына жұмсаған. Кейін бұл әрекетін жасыру үшін басшылықтың рұқсатынсыз автосалонға тиесілі 83 млн теңгелік жаңа көлікті клиентке берген.
Бұдан бөлек, айыпталушы сатуға қалдырылған құны 68 млн және 34 млн теңге болатын автокөліктерді сатып, ақшасын иемденген. Сондай-ақ, автосалон меншігіндегі құны 59 млн теңге тұратын жаңа Toyota Land Cruiser көлігін төмен бағамен өткізіп жіберген.
— Сот оны аса ірі мөлшерде алаяқтық және сеніп тапсырылған бөтен мүлікті иемдену баптары бойынша кінәлі деп таныды. Алғашқы үкіммен оған 5 жыл 1 ай бас бостандығынан айыру жазасы тағайындалған. Бұл ретте сот оның жасын және кінәсін ішінара мойындауын жеңілдететін мән-жай ретінде ескерген. Алайда прокурордың наразылығы негізінде кассациялық сот істі қайта қарап, жаза мерзімін 8 жылға дейін ұлғайтты. Себебі келтірілген материалдық шығын өтелмеген, — делінген хабарламада.
Мамандар азаматтарға көлік сатып алу кезінде сақ болуға кеңес береді. Атап айтқанда, келісімшарт талаптарын мұқият тексеріп, құжаттардағы мөрлердің сәйкестігіне көз жеткізу және төлемнің тікелей компанияның ресми шотына түскенін бақылау қажет.