Қызылорда қаласында биылғы жылы аула инфрақұрылымын жақсарту бағытында ауқымды жұмыстар қолға алынды. Облыс әкімінің қолдауымен 20 аулаға заманауи балалар ойын алаңдары мен спорт алаңдарын салуға 1,3 млрд теңге көлемінде қаржы бөлінді. Бұл бастама қала тұрғындарының демалыс сапасын арттырып, балалардың қауіпсіз әрі қолайлы ортада ойнауына жағдай жасауды көздейді.
Жоба аясында балалар мен жасөспірімдерге арналған кең ауқымды құрылымдар орнатылуда. Атап айтқанда, воркаут спорт алаңдары, кіші футбол алаңдары, балаларға арналған сырғанақтар, әткеншектер, карусельдер, арқанды өрмелеу элементтері мен балансирлер салынуда. Сонымен бірге тартан жабыны бар жасанды төсеніштер төселіп, қауіпсіздік деңгейі жоғарылатылуда.
Алаңдардың аумағы толық абаттандырылады: демалуға арналған орындықтар, қоқыс жәшіктері, көлеңке шатырлары орнатылады және жаяу жүргіншілер жолдары салынады. Бұл кешенді жұмыстар аула инфрақұрылымын жаңғыртып қана қоймай, тұрғындардың бос уақытын тиімді өткізуіне де мүмкіндік береді.
Қала тұрғындары үшін қолайлы орта қалыптастыру мақсатында жасалып жатқан бұл бастамалар алдағы уақытта Қызылорданың әлеуметтік келбетін жақсарта отырып, балалардың дене шынықтырумен белсенді айналысуына жаңа серпін беретіні сөзсіз.
