2025 жылғы 1 қазанда Жаңақорған ауданында қоғамның діни сауаттылығын көтеру мен жастарды теріс ағымдардан қорғауға бағытталған ауқымды ақпараттық-түсіндірме шаралары ұйымдастырылды.
Іс-шараларға Республикалық ақпараттық-түсіндірме тобының мүшесі, белгілі теолог Бақтияр Есенгелдіұлы арнайы шақырылып, әртүрлі әлеуметтік топтармен мазмұнды кездесулер өткізді. Ол жастармен, еңбек ұжымдарымен, мемлекеттік қызметкерлермен, дін өкілдерімен, осал топтармен, маргинал жастармен және вахталық әдіспен жұмыс істейтін азаматтармен жүздесіп, олардың сұрақтарына жан-жақты жауап берді.
Бұл кездесулер Жаңақорған аудандық қоғамдық даму бөлімінің «Аудан тұрғындары арасында діни экстремизм мен терроризмге қарсы күреске бағытталған шараларды өткізу және діни ахуал туралы түсіндірме жұмыстарын жүргізуді ұйымдастыру» атты әлеуметтік жобасы аясында, «Асыл Мұра-Орда» қоғамдық қорының қолдауымен жүзеге асты.
Кездесу барысында теолог қоғамда діни сауаттылықты арттырудың, рухани құндылықтарды дәріптеудің және ұлттық бірлікті нығайтудың маңыздылығына ерекше тоқталды. Ол жастардың теріс идеологияға қарсы иммунитетін қалыптастыруда әлеуметтік желілер мен жаңа коммуникациялық құралдардың ықпалын дұрыс бағамдау қажеттігін түсіндірді. Жаһандану дәуірінде ақпаратты сүзгіден өткізе білу – әрбір жас үшін басты қабілет екендігі айтылды.
Сондай-ақ, қазақ халқының бай рухани мұрасы, әдебиет пен жыраулар шығармаларындағы имандылық идеяларының тәрбиелік мәні ашып көрсетілді. Рухани-адамгершілік құндылықтар – ұрпақ тәрбиесінің темірқазығы екені, ал ұлттық дәстүр мен мәдениеттің діни тұрақтылыққа негіз болатыны атап өтілді.
Жиын соңында қатысушылар діни экстремизм мен жат ағымдардан сақтану жолдары, отбасындағы имандылық тәрбиесі және қоғамдағы тұрақтылықты сақтаудың ортақ жауапкершілігі туралы құнды ақпарат алды.