Мемлекет басшысы Қасым-Жомарт Кемелұлы Тоқаевтың 2025 жылды «Жұмысшы мамандықтар жылы» деп жариялауына орай, Шиелі ауданында ауылдардың әлеуметтік-экономикалық әлеуетін арттырып, тұрғындардың белсенділігін ынталандыру мақсатында «Ауыл күндері» байқауы бастау алған болатын.
Бұл ауқымды жоба — еңбек адамдарының мәртебесін көтеріп, ауыл тіршілігін жандандыруға, ел ішіндегі бірлік пен ынтымақты нығайтуға бағытталған. Байқау аясында елді мекендерде абаттандыру, мәдени-танымдық іс-шаралар, ауыл шаруашылығы өнімдерінің жәрмеңкелері өткізіліп, жұмысшы мамандықтарының қоғамдағы маңызы кеңінен насихатталуда.
«Ауыл күндері» байқауы бұған дейін көркейген, абаттандырылған Руханият алаңының алдында және халық игілігіне берілген жаңа «Денсаулық аллеясында» өткен болатын. Әр аптаның жұма күні дәстүрге айналған игі шара бүгін М.Шоқай атындағы орталық алаңда Тартоғай және Қоғалы ауылдық округтерінің өнер ұжымдары концерттік бағдарлама ұсынып, көрермендердің ыстық ықыласына бөленді. Ұлттық салт-дәстүр мен патриоттық рухты арқау еткен көріністер көпшіліктің көңілінен шықты.
Байқауға аудан әкімінің орынбасары Арман Дүйсенбаев арнайы қатысып, ауыл тұрғындарына жылы лебізін білдіріп, еңбек адамдарын дәріптейтін байқаудың маңыздылығына тоқталып, қатысушыларға сәттілік тіледі.
