2023 жылы Біріккен Ұлттар Ұйымы Бас Ассамблеясы 20 қыркүйекті Дүниежүзілік тазалық күні деп жариялау туралы арнайы қаулы қабылдады. Бұл күн жыл сайын әлемнің түкпір-түкпірінде аталып өтіп, азаматтарды қоршаған ортаны қорғау ісіне жұмылдыруға бағытталады. Басты мақсат – жер шарындағы экологиялық ахуалды жақсарту, табиғатты аялауға қоғам назарын аудару және әрбір азаматтың осы іске өз үлесін қосуына мүмкіндік беру.
Қазақстанда Мемлекет басшысының бастамасымен 2023 жылдан бастап «Таза Қазақстан» жалпыұлттық жобасы жүзеге асырылып келеді. Бұл жоба тұрғындардың экологиялық жауапкершілігін арттырып, табиғатқа жанашыр көзқарасын қалыптастыруға зор үлес қосып отыр.
Осы игі бастаманы қолдау мақсатында Қызылорда қаласында Дүниежүзілік тазалық күніне орай жалпықалалық сенбілік өткізілді. Акцияға мемлекеттік органдар мен ұйымдардың қызметкерлері, түрлі кәсіпорын ұжымдары, жастар ұйымдары, еріктілер және қала тұрғындары белсене қатысты.
Сенбілік аясында қала аумағындағы көшелер, аулалар, жаяу жүргіншілер жолдары, саябақтар мен скверлерде, сондай-ақ халық көп шоғырланатын қоғамдық орындарда кең көлемде санитарлық-тазалық жұмыстары жүргізілді. Арнайы техниканың көмегімен қоқыс қалдықтары шығарылып, қураған шөптер шабылды. Сонымен қатар, арықтар тазартылып, су өткізу арналарының жұмысын жақсартуға ықпал жасалды.
Тазалық жұмыстары тек қаланың орталық бөлігінде ғана емес, шет аймақтар мен тұрғын үй аулаларында да өтті. Қатысушылардың бірлескен еңбегінің нәтижесінде қала аумағы айтарлықтай тазартылып, санитарлық жағдайы жақсарды.
Мұндай іс-шаралар тұрғындардың экологиялық мәдениетін қалыптастыруға, қоғамда табиғатқа ұқыпты қарау дәстүрін орнықтыруға бағытталған. Сонымен бірге, сенбіліктер жастарға үлгі болып, өскелең ұрпақтың бойында туған жерге, қоршаған ортаға деген жауапкершілікті арттырады.
Дүниежүзілік тазалық күні аясында ұйымдастырылған бұл акция Қызылорданың экологиялық жағдайын жақсартуға, тұрғындардың өмір сүру сапасын арттыруға және қаланың көрікті келбетін сақтауға бағытталған маңызды қадам болды.
Барша қала тұрғындарын өз тұрғылықты аумақтарының тазалығына үлес қосып, аулаларын, көшелерін, қоғамдық орындарын таза ұстауға шақырамыз. Әр азаматтың шағын ғана еңбегі үлкен нәтижеге жеткізеді. Тазалық – табысты қоғамның кепілі!
