Биылғы бес айдың қорытындысы бойынша өлімнің бірқатар көрсеткіштерінің төмендеуі және балалар мен аналарға медициналық көмек көрсету тиімділігінің өсуі байқалған. Осылайша, ұлттық статистика бюросының (ҰСБ) деректеріне сәйкес, сәбилер өлімінің көрсеткіші 26,3%-ға, алты айда ана өлімі 9,7%-ға төмендеген.
Денсаулық сақтау министрлігінің мәліметінше оң нәтижелерге босандыру қызметі мен педиатриялық көмекті дамыту бойынша жүйелі жұмыс есебінен қол жеткізілген.
Жаңа туған нәрестелер хирургиясының дамуына байланысты жыл сайын туа біткен кемістігі (ТБК) бар 1500-ге жуық жаңа туған нәресте жедел ем алады. Оларды анықтау және емдеу үшін елде тиімді жұмыс істейтін инфрақұрылым – бір күндік клиникалар, ұрықты сақтау орталықтары, даму және ерте араласу орталықтары құрылды.
ТБК бар балаларды емдеуге арналған 40 орталық, көру, есту қабілетін сақтауға арналған 20 орталық жұмыс істейді, олардың бастапқы мүгедектігі 7,5%-ға төмендеген, ең бастысы – жаңа туған нәрестелердің өмір сүру деңгейі 88%-дан 93%-ға дейін артқан.
Қазіргі уақытта республикада 75 оңалту орталығы жұмыс істейді. «Қамқорлық» бастамасы шеңберінде 25 оңалту орталығы ашылған.
Кадрлық әлеуетті нығайту шеңберінде «Педиатрия» мамандығы қалпына келтірілді, 14 балалар мамандығы бойынша резидентура бөлінді.
2024 жылғы маусымнан бастап босандыру қызметін қаржыландыру ұлғайтылды: босандыру және балалық шақты қамтитын бес негізгі бейін бойынша тарифтер 40%-ға өсті. Бұл медициналық көмектің сапасын жақсартуға және оған қолжетімділікті арттыруға мүмкіндік берді.
Жалпы, бала туудың 14,6%-ға және халықтың табиғи өсімінің 20,3%-ға төмендеуіне қарамастан, Қазақстанның денсаулық сақтау саласында ана мен бала денсаулығын сақтау саласындағы тұрақты оң динамика байқалады.
Фото: Денсаулық сақтау министрлігі