Бүгін Сенат Спикері Мәулен Әшімбаевтың төрағалығымен Палата Бюросының отырысы өтті. Онда депутаттар 12 маусымда болатын Сенат отырысының күн тәртібін белгіледі.
Соған сәйкес Палата депутаттары алдағы бейсенбіде «2009 жылғы 9 маусымдағы Еуразиялық тұрақтандыру және даму қорын құру туралы шартқа өзгерістер енгізу туралы хаттаманы ратификациялау туралы» заңды қарайды. Сенаторлар атап өткендей, Хаттама Еуразиялық тұрақтандыру және даму қорын ұлттық валютадағы жобалар мен бағдарламаларды қаржыландыру мүмкіндігімен толыққанды дербес халықаралық ұйымға айналдыру үшін жасалған.
«Қазақстан Республикасының кейбір заңнамалық актілеріне тұрғын үй құрылысына үлестік қатысу, автомобиль жолдары және мүгедектігі бар адамдарды тасымалдау жөніндегі қызметтерді көрсету мәселелері бойынша өзгерістер мен толықтырулар енгізу туралы» заң да Сенат отырысының күн тәртібіне шығарылды. Бұл құжат тұрғын үйге қатысты жасалатын мәмілелердің ашықтығы мен қауіпсіздігін арттыруға, мүгедектігі бар адамдардың жүріп-тұру жағдайларын жақсартуға және автожол саласын жаңғыртуға бағытталған. Сондай-ақ заңда әлеуметтік қызметтер порталы және мемлекеттік сатып алу арқылы инватаксиге қол жеткізуді қоса алғанда, көрсетілетін қызметтердің сапасын бақылауды күшейтуге арналған түзетулер қарастырылған.
«Қазақстан Республикасының кейбір заңнамалық актілеріне құқық қорғау қызметін жетілдіру, құқық қорғау органдарының, арнаулы мемлекеттік органдардың, азаматтық қорғау органдарының қызметкерлерін және әскери қызметшілерді тұрғын үймен қамтамасыз ету және әлеуметтік қорғау, сондай-ақ ішкі істер органдарының қызметі саласында артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» заң мәселелердің кең спектрін қамтиды. Аталған құжат заңдарды артық нормалардан босатуға және заңға тәуелді актілер деңгейінде елде туындайтын өзгерістерге олардың нормативтік реттеу бөлігінде жедел көңіл бөлуді көздейді. Нақты айтқанда, есірткі құралдарының заңсыз айналымы мен теріс пайдаланылуына қарсы іс-қимыл, құқық қорғау органдарының қызметкерлерін, әскери қызметшілерді әлеуметтік қолдау сияқты шараларды күшейтуге мән беріліп отыр.
Сонымен қатар сенаторлар Палата отырысында «Қазақстан Республикасының кейбір заңнамалық актілеріне азаматтық қорғау, электр энергетикасы және мемлекеттік мүлікті басқару мәселелері бойынша өзгерістер мен толықтырулар енгізу туралы», «Нысаналы капитал қорлары және эндаумент-қорлар (нысаналы капиталдар) туралы» заңдарды және оған ілеспе «Қазақстан Республикасының кейбір заңнамалық актілеріне нысаналы капитал қорларының және эндаумент-қорлардың (нысаналы капиталдардың) қызметі, сондай-ақ Арал маңының қазақстандық бөлігінің экологиялық қолайсыз аумағы мәселелері бойынша өзгерістер мен толықтырулар енгізу туралы» заңды қарайды.
Іс-шара барысында Бюро мүшелері Сенат комитеттерінің осы аптада өткізілетін көшпелі отырыстарында талқыланатын мәселелерді пысықтап, Парламент Мәжілісінен келіп түскен заңдарды бөлді.
Дереккөз: Сенаттың Баспасөз қызметі
Суретті түсірген: Н.Байбулин