Оның хабарлауынша, Аягөз қаласында да жылу тапшылығы проблемасы болды. Екі айдың ішінде (тамыз-қыркүйек айларында) «Орталық» қазандығында әрқайсының қуаты 10 Гкал/сағат болатын үш қазандық орнатылды. 3,9 шақырым жылу желілері ауыстырылып, жылу мәселесі толық шешілді.
«Курчатов қаласында, Жарма, Бородулиха, Жаңасемей аудандарында 9 жылу көзінде және 4 шақырым жылу желілерінде жөндеу жұмыстары жүргізілді. Бүгінге жылу көздері көмірмен толық қамтылған, халық пен бюджеттік мекемелерге қажетті қор жеткізілген. Жалпы, жылыту маусымы 28 қыркүйекте басталып, штаттық режимде өтіп жатыр», – деді Б.Уәли.
Семей қаласының оң жағалауында жылу энергиясының тапшылығы бар. Бұл мәселені шешу үшін Президенттің жаңа жылу электр орталығын салу туралы тікелей тапсырмасы бар. Осы мақсатпен әкімдіктің, «Самұрық-Энерго» акционерлік қоғамы мен жобалаушының қатысуымен жедел жұмыс тобы құрылды. Қазір құрылыс алаңы мен күл үйіндісін жинақтау орны анықталды, техникалық-экономикалық негіздемесін әзірлеу жұмыстары аяқталу сатысында. Жылу қуаты – 1000 Гкал, электр қуаты — 360 МВт болады. Құрылыстың 1-ші кезеңін пайдалануға берудің болжамды мерзімі – 2029 жылдың 3-ші тоқсаны. Жоба аясында экологиялық тұрғыдан қолайсыз және қуаттылығы төмен қазандықтар жабылады.
Сондай-ақ өңір басшысы сумен жабдықтау мәселесіне ерекше тоқталып өтті. Оның айтуынша, биыл сумен жабдықтау қызметтеріне 100% қолжетімді ету керек. Биыл барлық қаржыландыру көздері есебінен 16,7 млрд теңге бөлініп отыр. Оның ішінде арнаулы мемлекеттік қор есебінен 10,1 млрд теңге берілді. Аталған қаражатқа жыл соңына дейін 33 жоба жүзеге асырылып, ауыз сумен 38 мың адам қамтылады. Нәтижесінде облыстың сумен қамтылу деңгейі 100%-ға дейін жеткізу жоспарлануда.
Су желілерінің тозуын азайту мақсатында биыл 4 жоба аяқталып, тозу деңгейі 40%-ға дейін төмендетіледі. Келесі жылға 24 су желілерін қайта құру жобаларын іске асыру жоспарланып отыр.