Қызылорда қаласының келбеті жыл санап көркейіп келеді. Тәуелсіздіктің 25 жылдығы даңғылының екінші кезеңі аяқталып, Әбілқайыр хан көшесінен Саламатов көшесіне дейінгі аралықтағы жаңа автомобиль жолы пайдалануға берілді. Салтанатты ашылу рәсіміне ҚР Парламенті Сенатының депутаттары, қоғам қайраткерлері, қала тұрғындары мен зиялы қауым өкілдері қатысты.
Аймақ басшысы Нұрлыбек Нәлібаев жиналған жұртшылықты қуанышты оқиғамен құттықтап, қала инфрақұрылымын дамытуда атқарылып жатқан ауқымды жұмыстарға тоқталды.
“Қызылорда — мегаполис болмағанымен, қарқынды қалалық инфрақұрылым мен өмір сүру сапасын арттыру, экономиканы әртараптандыру бағытында нақты қадам жасаған қала. Халық саны жыл сайын өсуде, аймақ тұрғындарының шамамен 50%-ға жуығы облыс орталығында тұрады. Біз жұртшылықтың жайлы өмір сүруіне бағытталған, қауіпсіз, таза, қолжетімді әрі зияткер қала құру бағытында нақты қадамдар жасадық.– деді өңір басшысы.
Соңғы жылдары облыс орталығында жол инфрақұрылымы айтарлықтай жаңарды. Шиелі ауданынан кіреберіс жол, Яссауи және Жаппасбай батыр көшелері кеңейтіліп, төрт жолақты қозғалыс қамтамасыз етілді. Ал бүгін ел игілігіне табысталған жаңа даңғыл – сол жұмыстардың заңды жалғасы.
Қорқыт ата әуежайының жаңа терминалынан Гагарин көпіріне дейін созылған 27,3 шақырымдық жол заманауи стандарттарға сай төрт жолақты болып салынды. Жол бойындағы Сыздық, Жаңадария және Шіркейлі каналдары үстінен өтетін үш көпір де қайта жаңғыртудан өтті. Бұл ірі жобаны жүзеге асыруға бюджеттен 23 миллиард 962 миллион теңге бағытталған.
Жолдың сапалы әрі уақытылы салынуына үлес қосқан «УАД» ЖШС ұжымына облыс әкімінің атынан алғыс білдірілді. Мердігер ұйым қызметкерлері Құрмет грамоталары және Алғыс хаттармен марапатталды.
Ашылу рәсімі авто және велошерумен жалғасты. Шеру барысында соңғы жылдары өңірде техникалық жарақтандыру бойынша жасалған ілгері қадамдар көрініс тапты. Мәселен, үш жыл ішінде облыстың медицина саласына – 270 санитарлық көлік, білім саласына – 30 оқушы автобусы, қоғамдық көлік паркіне – 300 жаңа автобус пен 100 экотакси, төтенше жағдайлар қызметіне – 31 өрт сөндіру техникасы, коммуналдық мекемелерге – 169 арнайы техника, ветеринария саласына – 98 жаңа көлік берілген.
