Бүгін аудан әкімі Алмасбек Есмаханов бар ғұмырын ұрпақ тәрбиелеу ісіне арнап, ұстаздық жолда қажырлы еңбек еткен ардагер ұстаздармен кездесті. Руханият орталығында өткен басқосуда аудан басшысы ардагер ұстаздар қауымына ұлағатты ұрпақ тәрбиелеудегі еңбектері үшін алғысын білдіріп, мерекемен құттықтады.
Бүгінгі күн – еліміздің өсіп-өркендеуіне өлшеусіз үлес қосқан, жүрегінде ел мен жерге деген адалдықтың оты мәңгі сөнбеген қазыналы қарттарымыз бен шәкірт жүрегіне білім нәрін сепкен ұстаздарымыздың мерейлі мерекесі. «Қариясы бар елдің қазынасы бар», «Ұстазы жақсының – ұстамы жақсы» дейді дана халқымыз. Абыз ақсақалдарымыз бен асыл аналарымызды ардақтау, ардагер ұстаздарымызды құрметтеу – біздің қастерлі парызымыз. Егемен еліміздің нығаюына, туған жеріміздің гүлденуіне қосқан қажырлы қызметтеріңіз үшін Сіздерге барша аудан жұртшылығының және Өзімнің атымнан ризашылығымды білдіріп, шынайы алғысымды айтамын,- деді Алмасбек Әбілқасымұлы.
Мерекелік басқосуда аудан әкімі «Қазақстан Республикасы білім беру ісінің үздігі», ардагер ұстаз Серік Қуанышбаевты 75 жас мерейтойымен және бір шаңырақ астында отау құрғандарына 50 жыл болған ұстаздар отбасы Жеткербай мен Зейнегүл Махамбетовтерді мерейтойларымен құттықтап, құрмет көрсетті. Сонымен қатар ұзақ жылдар бойы білім беру саласында аянбай тер төккен ардагер ұстаздар қауымына аудан әкімінің арнайы сыйлықтары мен гүл шоқтары табысталды.
Шарада Қазалы ауданының құрметті азаматы, Қазалы ауданы білім саласы ардагерлер қоғамдық ұйымының төрағасы Серік Қуанышбай, ҚР Білім беру ісінің үздігі, ҚР мұғалімдер сезінің делегаті Кәдіркүл Жұбатқанова және басқа да білім саласының ардагерлері сөз сөйлеп, мерекеге орай құрмет көрсетіп жатқан аудан басшысы мен барша азаматтарға шынайы ризашылықтарын жеткізді.
Мерекелік басқосуда аудандық мәдениет үйінің өнерпаздары ардагер ұстаздар қауымына арнап ән шырқап, ерекше көңіл-күй сыйлады.
