Атырау облысының әкімі Серік Шәпкеновтің айтуынша, кейінгі жылдары тұрғындардың өмір сапасын жақсартуға, әлеуметтік нысандар мен инфрақұрылымды дамытуға жаңа жұмыс орындарын ашуға бағытталған ауқымды жұмыс қолға алынды. Алдағы уақытта осындай бастамалар жүйелі жалғасып, өңірдің экономикалық әлеуетін арттыру, жастарға жаңа мүмкіндіктер ұсыну, ауылдарды өркендету мәселесі басты назарда болады.
Қазір мұнайлы өңір инвестиция тарту бойынша жетекші облыстардың қатарында тұр. Биыл облыс делегациясы Ресей, Қытай, Пәкістан, Германия, АҚШ, Ұлыбритания, Израиль, Қатар, Испания, Италия, Аустралия, Литва, Өзбекстан елдерінің басшыларымен, ірі бизнес өкілдерімен келіссөздер жүргізді. Нәтижесінде, 20-дан астам ынтымақтастық орнату жөніндегі құжаттарға қол қойылды. Оның ішінде индустриялық парк құру, жел және газ электр стансаларын салу, жасыл энергетика жобалары бар.
«Осы кезге дейін мұнай өнімдерін шикізат күйінде ғана экспорттаумен айналыстық. Әсіресе өнім өңдеу, өндіру өнеркәсібі шет қалды. Қазір өңірде 599 кәсіпорын жұмыс істейді. Оның 4-еуі – ірі, 13-і – орта, 582-сі шағын кәсіпорындар. Өңір экономикасын әртараптандыру аясында ірі жобалар қолға алынып отыр. Былтыр жылына 6 мың жүк вагонын шығару жобасы іске қосылды. Өңірде жалпы құны 44 млрд теңге құрайтын 11 жобаны жүзеге асыру қолға алынды. Оның 2-еуі жұмысын бастады. Бұған қоса, құны 6,5 трлн теңгеге бағаланған 5 ірі мұнай-газ химия жобасы жүзеге асырылып жатыр. Бұл жобалар құрылыс кезінде 18 мың жұмыс орнын, іске қосылғанда 3 мың тұрақты орынды қамтамасыз етеді», дейді С.Шәпкенов.
Көмірсутекті шикізаты мол өңірде «Ұлттық индустриалдық мұнай-химия технопаркі» арнайы экономикалық аймағында 18 қатысушы тіркелген. Мұнда инвесторларға салықтық, кедендік жеңілдіктер ұсынылады. Аталған аймақта жылына 500 мың тонна өнім шығаратын полипропилен кешені салынды. Алдағы жылдары полиэтилен, бутадиен өндірісін іске қосу жоспарланып отыр.
Әкімнің мәліметіне сүйенсек, 2025–2029 жылдары құны шамамен 7 трлн теңгені құрайтын 46 инвестициялық жоба жүзеге асырылады. Жобалар өңірге 6 мыңға жуық жаңа жұмыс орнын ашуға мүмкіндік береді. Саланы цифрландыру мақсатында Атырау облысының инвестициялық картасы әзірленді. Бұл геопортал инвесторларға өңір мүмкіндігімен танысуға, жаңа жобаларға қатысуға, өз бастамаларын ұсынуға жағдай жасайды.
«Ұстанатын басты мақсатымыздың бірі – азық-түлік қауіпсіздігін қамтамасыз ету мақсатында игерілмей жатқан ауыл шаруашылығы жерлерін қайтару, тиімді пайдалану. 2022–2025 жылдары аралығында жалпы көлемі 564,3 мың гектар жер мемлекет меншігіне қайтарылды. Оның 283,5 мың гектары ғана қайта айналымға енгізіліп, жаңа жер пайдаланушыларға табысталды. Бірақ әлі де бұл жұмысты жүйелеп, күшейту қажеттігі туындап отыр», дейді облыс әкімі.
Серік Шәпкеновтің мәліметіне қарағанда, биыл 2 ірі жоба іске қосылды. Біріншісі – «Dossor Processing Company» компаниясының қуаттылығы жылына 48 мың тонна құрамажем өндіретін зауыты. Бұл өндіріске 602 млн теңге инвестиция салынған. Ал екінші жобаны «Қуаныш» шаруа қожалығы іске асырды. Жылына 300 бас мал бордақылау алаңының құны – 300 млн теңге. Енді 2027 жылға дейін 48,3 млрд теңгеге 12 инвестициялық жоба іске қосылып, 458 жаңа жұмыс орнын ашу жоспарланып отыр.
«Маңызды жобалар қатарында «Goldbridge» компаниясымен қант зауытының құрылысы бар. «KazGrow Irrigation Systems» компаниясы 5,6 гектарға зауыт пен өнеркәсіптік жылыжай салады. Бекіре балығын өңдейтін 2 зауытта жылына 700 тонна өнім шығарылады. «Дәулет құс» күніне 250 мың жұмыртқа шығаратын фабриканы жаңғыртуға 1 млрд теңге инвестиция салғалы отыр. Құрманғазы ауданы мен Атырау қаласындағы көтерме орталық базасында агрохаб жобалары бар», деп мәлімдеді С.Шәпкенов.
Жолдасбек Көшербайұлы