Қазақстан Республикасы Үкіметінің «Қазақстан Республикасындағы мерекелік күндердің тізбесін бекіту туралы» 2017 жылғы 31 қазандағы № 689 қаулысына сәйкес 5 қыркүйек – халқымыздың тағдыры мен тілі үшін күрескен, қазақ әліпбиінің негізін салған, ұлт ұстазы, Алаштың ардақтысы Ахмет Байтұрсынұлының туған күніне орайластырып, Қазақстан халқы тілдері күні болып бекітілді.
Осыған орай, Қазақстан халқы тілдерінің күнін атап өтудің облыстық іс-шаралар жоспары бекітіліп, онкүндік жарияланды.
Онкүндіктің әрбір күніне «Тіл болашағы – балабақшада», «Мемлекеттік тіл – ел бірлігінің негізі», «Қауырсын қалам», «Тіл – татулық тірегі», «Тіл – ғұмыр», «Тіл туралы толғамдар», «Жастар және тіл», «Тіл және қоғам», «Мемлекеттік тіл – қоғамдық көліктерде», «Сөз маржанын терсеңіз» тақырыптары белгіленді.
Ең бастысы — Достық үйінде Қызылорда облысының қоғамдық даму басқармасының ұйымдастыруымен онкүндіктің негізгі «Тіл – татулық тірегі» атты мерекелік шарасы өтті.
Шараға қала, аудан әкімдерінің идеология жөніндегі орынбасарлары, қалалық, аудандық мәдениет және тілдерді дамыту бөлімдерінің басшылары мен тіл мамандары, аймақтағы зиялы қауым өкілдері, тіл жанашырлары, барлық мекеме және оқу орындары басшылары, этномәдени бірлестік өкілдері, «Қазақ тілі» қоғамының облыстық, аудандық филиалдарының төрағалары, студент жастар мен бұқаралық ақпарат құралдары өкілдері және облыстық, аумақтық мекемелердің басшылары мен мемлекеттік тілге жауапты қызметкерлері келіп қатысты.
Мемлекеттік тілдің қолдану аясын кеңейту және оны ұлтаралық қатынас тіліне айналдыру, сондай-ақ, отансүйгіштік сезімді арттыру және ұлттар достастығының үлгісін паш ету мақсатында ұйымдастырылған шара театр әртістерінің сомдауымен қойылған «Ұлылар үндестігі» атты прологпен ашылды.
Мерекелік шарада облыс әкімінің орынбасары М. Шермағанбет құттықтау сөз сөйлеп, облыстағы бірқатар тіл жанашырлары мен сала мамандарын ҚР Ғылым және жоғары білім министрлігінің «Ана тілін дамытуға қосқан үлесі үшін» төсбелгісімен, Құрмет грамоталарымен, Алғысхаттарымен және облыс әкімінің Алғысхаттарымен марапаттады.
Сондай-ақ, жыл көлемінде халыққа мемлекеттік тілде сапалы қызмет көрсетіп отырған әр түрлі сала ұжымдары «Үздік қазақтілді кәсіпкерлік нысан», «Үздік қазақтілді мұнай компаниясы», «Үздік қазақтілді тасымалдау ұйымы», «Үздік этномәдени бірлестік», «Үздік қазақтілді балабақша» номинацияларымен марапаттады.
Шара барысында жиналған қауымға мерекелік шашу ретінде әзірленген концерттік бағдарлама ұсынылды.
Халық пен халық, ұлт пен ұлыс бірлесе өмір сүріп отырған мемлекетте өз халқыңды, өз тіліңді сүюмен бірге өзге халықты және оның мәдениеті мен өнерін құрметтеу, тілін қастерлеу — қазіргі қоғамның басты өлшемдерінің бірі.
Осы мақсатта өткізілген салтанатты шара «Қазағым, елім!» әнімен аяқталды.
