Украина президенті Владимир Зеленский АҚШ-қа ресми сапары барысында Дональд Трамптың Қырымнан бас тарту туралы ұсынысына жауап берді. Ол бірнеше жыл бұрын Киевті Қырым мен Донбастың бір бөлігін беруге мәжбүрлегенін, бірақ мұндай қателік енді қайталанбауы тиіс екенін айтты.
Зеленскийдің мәлімдемесі
Вашингтонға барған Украина басшысы елдің басты мақсаты – соғысты аяқтау және ұзақ мерзімді бейбітшілікке қол жеткізу екенін жеткізді. Дегенмен ол бейбітшілік тек әділ болуы тиіс екенін атап өтті:
«Біз бәріміз соғыстың тезірек аяқталуын қалаймыз. Бірақ бейбітшілік ұзаққа созылуы керек. Бірнеше жыл бұрын Украинаны Қырым мен Донбастың бір бөлігін беруге мәжбүр етті. Путин мұны жаңа шабуыл үшін плацдарм ретінде пайдаланды. Енді бұлай болмауы тиіс. Украиндар өз жері мен тәуелсіздігі үшін күресіп жатыр. Біз Қырымнан да бас тартпаймыз», – деді Зеленский.
Ол сондай-ақ Донецк пен Сумы облыстарында украин әскері жетістіктерге қол жеткізгенін айтып, «АҚШ пен Еуропаның қолдауы Ресейді шынайы бейбітшілікке мәжбүр етеді» деп сенім білдірді.
Трамптың сөзі
Зеленскийдің сапарына дейін АҚШ президенті Дональд Трамп «егер қаласа, Зеленский Ресеймен соғысты тез арада тоқтата алады» деп мәлімдеген еді. Оның ойынша, бұл үшін Украина Қырымнан және НАТО-ға кіру ниетінен бас тартуы тиіс.
АҚШ мемлекеттік хатшысы Марко Рубио NBC News-ке берген сұхбатында Киевті жерлерінен бас тартуға ешкім мәжбүрлемей отырғанын айтты. Бірақ ол бейбіт келісімнің орындалмауы мүмкін екенін де жоққа шығармады.
Алдағы кездесу
18 тамыз күні Ақ үйде Дональд Трамп, Владимир Зеленский және бірқатар Еуропа лидерлерінің қатысуымен маңызды кездесу өтпек. Батыс елдері Аляскадағы Трамп пен Путиннің үш сағаттық келіссөзінде не туралы уағдаласқанын толық білмей отыр.