АҚШ президенті Дональд Трамп Украина басшысы Владимир Зеленский және бірқатар еуропалық көшбасшылармен Ақ үйде келіссөз жүргізу барысында Ресей президенті Владимир Путинге қоңырау шалды.
Ақпарат көздерінің мәліметінше, телефон әңгіме шамамен 40 минутқа созылған. Трамп әңгіме барысында Зеленскиймен және Еуропа елдерінің өкілдерімен өткен кездесудің мазмұнын баяндап, алдағы дипломатиялық қадамдар туралы пікір алмасты.
АҚШ президенті Путинмен сөйлесу арқылы Украина мәселесін шешуде жаңа форматтағы үшжақты саммит өткізуге жол ашқысы келетінін жеткізді. Бұл бастамаға сәйкес, алдымен Путин мен Зеленский жеке жүздесуі тиіс, содан кейін үшжақты кездесу ұйымдастырылмақ.
Еуропалық саясаткерлердің бір бөлігі мұны «оң сигнал» деп қабылдады. Бұл әрекет Трамптың Украинадағы соғысты тоқтату үшін тікелей диалог орнатуға ұмтылысының бір көрінісі ретінде бағалануда.
Путин тарапынан ресми түсініктеме берілмесе де, бірқатар ақпарат агенттіктері Кремльдің мұндай кездесуге дайын екенін хабарлады.
Осылайша, Ақ үйдегі келіссөздер барысында жасалған бұл күтпеген қадам халықаралық қауымдастық назарын өзіне аударып отыр.
Фото: БАҚ