Спортта ешкім күтпеген кездейсоқ жеңіс болмайды. Әр жетістіктің артында ұзақ жылғы тынымсыз еңбек, темірдей тәртіп және ең бастысы, сол чемпиондық жолдан өткен жаттықтырушы тұрады. Қазақ спортында да бұл заңдылық жұмыс істейді. Ұлттық құрама спортшыларының көптеген жеңісіне біз бұрын тұғыр сатысынан көрген мамандардың қосқан үлесі зор.
Мұның жарқын көрінісі – Елдос Сметов. Ол – дзюдодан Олимпиадада барлық медаль жиынтығын олжалаған тұңғыш қазақ палуаны. Отандасымыз Парижде – алтын, Риода – күміс, Токиода қола медаль жеңіп алды. Оның спорттағы жолы Жамбыл облысында басталды. Алғашқы бапкері – Ахмет Жұмағұлов. Кейіннен Сметовті халықаралық дәрежедегі спорт шебері және халықаралық бәсекелердің жүлдегері Ғалымжан Жылгелдиев жаттықтыра бастаған. Бүгінде Жылгелдиев әлі де Сметовпен және құраманың басқа да көшбасшыларымен жұмыс істейді. Тәжірибелі маман оларға күрес техникасын ғана емес, бойына чемпионға тән қасиетті сіңіріп келеді.
Ал Ольга Довгунның тарихы өз алдына бөлек әңгіме. Ол – нысана көздеуден Азияның бірнеше дүркін чемпионы және үш Олимпиадаға қатысқан мерген. Қазір жас спортшылармен, оның ішінде Париж Олимпиадасының қола жүлдегері Ислам Сәтпаев және Александра Лемен жұмыс істейді. Довгунның тәжірибесінің арқасында Ұлттық құрама тұрақты нәтиже көрсетіп, халықаралық жарыстарға жүйелі дайындық жүргізіп жатыр.
Шаңғы жарысынан да мықтап орныққан ұрпақ сабақтастығын байқауға болады. Биыл ақпан айында өткен қысқы Азия ойындарының жүлдегері Константин Борцов дәл сол Харбинде 1996 жылы өткен Азиаданың 3 дүркін жүлдегері, әкесі Владимир Борцовтың жетекшілігімен жаттығады. Сенім мен түсіністікке құрылған мұндай сабақтастық тұрақты нәтижеге қол жеткізуге жол ашады.
Фристайл-могул – Қазақстандағы ең табысты қысқы спорт түрінің бірі. Ұлттық құраманың бас бапкері Елена Круглыхина кезінде Олимпиадада сынға түскен. Оның тәжірибесі мен осы спорттағы терең білімі командаға халықаралық аренада тұрақты нәтиже көрсетуге мүмкіндік береді. Оның жетекшілігімен Юлия Галышева 2018 жылы Олимпиаданың қола жүлдегері атанса, Анастасия Городко жасөспірімдер арасында бірнеше рет әлем чемпионы атанды.
«Чемпиондарды чемпиондар тәрбиелейді» деген сөздің жаны бар. Қазақстанда бұл жай ғана әдемі сөз тіркесі емес. Еліміздің туын әлемдегі ірі жарыстарда биікте желбіретуге мүмкіндік беретін тиімді жүйе.