Бүгін орталық стадионда «Алтын күз – 2026» мерекесі кең көлемде ұйымдастырылды. Шараға аудан әкімі Ерлан Төрәлиев, Қазақстанның Еңбек Ері Имамзада Шағыртаев, қоғам қайраткерлері Қожахмет Баймаханов, Биғали Қаюпов, Өмірбек Шаменов, Жанкелді Ысқақ, сондай-ақ, зиялы қауым өкілдері мен құқық қорғау органдарының басшылары қатысты.
Мерекеге жиналған меймандар аудан әкімімен бірге ауыл шаруашылығы өнімдерінің көрмесін аралап, шаруашылықтардың жетістіктерімен танысты. Сонымен қатар, көпшілік назарына ұсынылған ұлттық дәстүрлеріміздің бірі – тұсаукесер рәсімі өткізіліп, арнайы тігілген киіз үйлерде қонақтарға ұлттық тағамдар ұсынылды.
Салтанатты жиында аудан әкімі Ерлан Төрәлиев жиналған қауымды мерекемен құттықтап, ауданның әлеуметтік-экономикалық дамуына, ауыл шаруашылығы саласының өркендеуіне үлес қосып жүрген озат еңбеккерлер мен сала мамандарын марапаттады.
«Баршаңызды береке мен бірліктің, еңбек пен ырыстың нышанына айналған «Алтын күз» мерекесімен шын жүректен құттықтаймын! Алтын күз – ала жаздай тынымсыз еңбекті қорытындылап, маңдай тердің жемісі бағаланатын, ел ырысы мен берекесін ұлықтайтын ерекше кезең. Ауыл шаруашылығы – ел экономикасының маңызды салаларының бірі, ауыл тіршілігі мен халық әл-ауқатының негізгі тірегі. Оның дамуы табанды еңбек пен туған жерге деген шынайы жанашырлыққа тікелей байланысты. Ауданымыз биыл облыс көлемінде «Егін шаруашылығы саласында озат аудан» номинациясын иеленді. Бұл – барша Жалағаш жұртшылығы үшін зор мәртебе, ортақ мақтаныш. Осы орайда, жыл бойы табандылықпен еңбек етіп, жоғары нәтижелерге қол жеткізген шаруашылық басшыларына, диқандарға, малшыларға, механизаторларға және ауыл шаруашылығы саласының барлық қызметкерлеріне шынайы алғысымды білдіремін» – деді аудан әкімі Ерлан Төрәлиев.
Мерекелік кеш театрландырылған көріністермен, ұлттық билермен және жергілікті өнерпаздардың әсем әндерімен жалғасты. Кеш қонағы, белгілі эстрада әншісі Кенжебек Жанәбілов сахнада танымал әндерін орындап, көрермендердің ыстық ықыласына бөленді.
Шара соңы мерекелік отшашумен қорытындыланды.
Айта кетейік, биыл аудан бойынша 41 864 гектар алқапқа ауыл шаруашылығы дақылдары орналастырылды. Оның ішінде 16 618 гектарға күріш егіліп, әр гектардан орта есеппен 60,5 центнерден өнім жиналды.
