Бүгін, 12 тамыз – Халықаралық жастар күніне орай Арал қаласында ашық аспан астында жастарға арналған «OPEN AIR» мерекелік гала-концерті өтті.
Жастықтың жалынды рухы мен өнердің өрісін тоғыстырған кеште ауданның талантты жастары өз өнерлерін ортаға салып, көрерменге көтеріңкі көңіл күй сыйлады.
Кеш барысында елдің ертеңі – қазақ жастарына арналған рухты әндер шырқалып, түрлі би қойылымдары ұсынылды. Ауданымыздың өнерпаздары, әншілері, бишілері, жайдарманшылары мен жас ақындары сахна төрінде өнер көрсетіп, туған жердің талантқа бай екенін тағы бір мәрте дәлелдеді.
Әсіресе, ауданымыздың атын облыстық, республикалық және халықаралық деңгейде танытып жүрген спорт, мәдениет, шығармашылық бағыттағы жастардың жетістіктері көпшілікке таныстырылды. Мәдениет пен өнер саласында облыстық, республикалық, халықаралық байқауларда топ жарып жүрген талантты жастардың өнері де кештің ажарын аша түсті.
Ашық аспан астындағы жастар мерейін үстем еткен кешке аудан әкімі Аманжол Оңғарбаев арнайы қатысып, мерекеге орай аудан жастарына өзінің ізгі лебізін арнады. Жастар саясаты саласында атқарылып жатқан жұмыстарды тілге тиек етіп, еліміздің келешегіне айналған аудан жастарына сәттілік тіледі.
Мерекелік кеш аясында қоғамдық өмірде белсенділігімен ерекшеленіп, білім, мәдениет, спорт, еріктілік және шығармашылық салаларында үздік жетістіктерге жеткен бірқатар жастар марапатталды. Қасиетті қара домбырасын серік еткен Бексұлтанның жырдан шашу шашып, жастарға ақжарма тілегін арнауы кештің мазмұнын тереңдете түсті. Ал кештің көрерменге тарту еткен тағы бір сыйы елімізге белгілі өнер иелерінің қатысуы.
Қызылорда қаласынан арнайы келген талантты әншілер Олжас пен Назым сырлы әндерімен көпшілікке көтеріңкі көңіл күй сыйласа, қазақ өнерінде өзіндік қолтаңбасын қалыптастырған әнші-сазгер, жерлесіміз Үкітай Ерниязов өзінің көпшілік сүйіп тыңдайтын әндерін орындап, Арал аспанын әсем әуенге бөледі.
Ашық аспан астындағы әсем кеште ән мен би, өнер мен жастардың жалынды үні бір арнада тоғысты.
