Қызылорда облысының Өңірлік коммуникациялар қызметінде өткен брифинг барысында аудан әкімі Айтбай Жандарбеков ауыл шаруашылығы саласындағы негізгі көрсеткіштер мен алдағы міндеттерге тоқталды.
Ауыл шаруашылығы – Шиелі ауданы экономикасының жетекші салаларының бірі. Биылғы жылдың 6 айында салада 5 млрд 711 млн теңгенің өнімі өндіріліп, өткен жылдың сәйкес кезеңімен салыстырғанда 105,1 пайыздық өсімге қол жеткізілді.
Мал шаруашылығында да оң динамика сақталуда. Бүгінде ауданда 85 734 бас ірі қара, 130 061 бас қой-ешкі, 29 151 жылқы және 1 842 түйе тіркелген.
Мемлекет басшысының тапсырмасына сәйкес пайдаланылмай жатқан ауыл шаруашылығы жерлерін мемлекет меншігіне қайтарып, қайта айналымға енгізу жұмыстары нәтижесінде 41 960 гектар жер игеріске тартылып, жоспар 102 пайызға орындалды.
Биыл ауданда 32 мың 515 гектарға ауыл шаруашылығы дақылдары егілді. Оның ішінде негізгі дақыл – күріш 11 600 гектарды құрайды. Сонымен қатар, су үнемдеу технологияларын енгізу жұмыстары қарқынды жүргізілуде. Атап айтқанда, тамшылатып және жаңбырлатып суару әдістері арқылы жүгері, бидай, сүрлемдік жүгері мен мал азықтық дақылдар өсірілуде.
Егіс алқаптарының өнімділігін арттыру мақсатында 10 мың гектар жер лазерлік тегістеуден өткізілді. Егіске қажетті минералды тыңайтқыштар мен гербицидтер толық көлемде жеткізіліп, көктемгі дала жұмыстары уақытылы ұйымдастырылды.
Бүгінде ауданнан өндірілген 5,4 мың тонна күріш пен бақша өнімдері Ресей, Қырғызстан, Тәжікстан және еліміздің өзге өңірлеріне экспортталуда. Соңғы төрт жылда ауыл шаруашылығы техникасының жаңару деңгейі 68,5 пайызға жетті.
Сонымен қатар, «Ауыл аманаты» бағдарламасы аясында биыл 31 жобаға 310 млн теңге көлемінде жеңілдетілген несие мақұлданды.
Су ресурстарын тиімді пайдалану бағытында да маңызды жобалар жүзеге асырылуда. Жалпы ұзындығы 38,2 шақырым болатын 10 каналды жаңғырту бойынша жобалық-сметалық құжаттар әзірленіп, мемлекеттік сараптамаға жолданды.
Сондай-ақ, жоба құны 1 млрд 912 млн теңгені құрайтын, ұзындығы 28 шақырымдық «Құмжарған» каналының құрылысы жалғасуда. Бүгінде 5 шақырымы қазылып, қалған бөлігі жыл соңына дейін аяқталады. Жоба іске асқаннан кейін Сұлутөбе және Майлытоғай ауылдық округтеріндегі елді мекендер мен 5 мың гектарға жуық ауыл шаруашылығы алқабы аяқ сумен қамтамасыз етіледі.
