Мемлекеттік қызмет – үлкен жауапкершілік пен адалдықты талап ететін абыройлы міндет. Осы жолда саналы ғұмырын ел игілігіне арнап келе жатқан азаматтардың бірі – Ахметов Ибрайхан Біртайұлы.
Ибрайхан Біртайұлы ветеринария саласында 41 жылдан астам уақыт табанды еңбек етіп, Қазақстан Республикасының ветеринариялық қауіпсіздігін қамтамасыз ету ісіне өлшеусіз үлес қосып келеді. Ол еңбек жолын қарапайым малдәрігері ретінде бастап, бүгінде Жаңақорған аудандық аумақтық инспекциясының басшысы қызметін абыроймен атқаруда.
Көпжылдық тәжірибесі мен кәсіби біліктілігінің арқасында ол өзін білікті басшы, жауапты мемлекеттік қызметші және өз ісінің нағыз маманы ретінде таныта білді. Әріптестері оның жоғары кәсібилігін, әділдігін, адамгершілігін және кез келген жағдайда қолдау көрсетуге дайын тұратын қасиетін ерекше бағалайды.
Ибрайхан Біртайұлы жас мамандарға бағыт-бағдар беріп, өз тәжірибесімен бөлісіп келеді. Оның тәлімін алған көптеген мамандар бүгінде ветеринария саласының дамуына өз үлестерін қосуда.
Оның өмір жолы – қызметтік борышқа адалдықтың, мамандыққа деген сүйіспеншіліктің және мемлекетке қалтқысыз қызмет етудің жарқын үлгісі.
Осындай азаматтардың еңбегі мемлекеттік қызметтің беделін арттырып, қоғамның мемлекеттік институттарға деген сенімін нығайтады.
Ибрайхан Біртайұлына зор денсаулық, отбасына амандық, алдағы қызметіне толағай табыс тілейміз!