«Соңғы жарты ғасырда вакциналау миллиондаған адамның өмірін сақтап, нәрестелер өлімін шамамен 40%-ға дейін айтарлықтай төмендетуді қамтамасыз етті. ДДСҰ Еуропалық өңірінің 53 елінде жоспарлы иммундаумен жоғары деңгейде қамтудың арқасында біз полиомиелиттен бос аумақ мәртебесін сақтап отырмыз және қызылша, қызамық пен В гепатитін толық жоюға қарай жүйелі түрде келе жатырмыз. Бір кездері жаппай қауіп саналған дифтерия мен сіреспе сияқты аурулар бүгінде сирек кездесетін жағдайға айналды», – деді ол.
Сонымен қатар Еуропалық өңір елдері пневмококк, ротавирус инфекцияларына қарсы вакциналауды қоса алғанда, қорғаудың заманауи стандарттарын сәтті енгізуде, сондай-ақ болашақ ұрпақтың қатерлі ісікке шалдығуының алдын алу үшін АПВ-ға қарсы екпемен қамтуды кеңейтуде. Болашақ аналарды вакцинациялау әйелді сенімді қорғайды және нәрестеге РСВ-инфекциясына (респираторлық-синцитиальды вирус), көкжөтел мен тұмауға қарсы өмірлік маңызды иммунитетті береді.
«Аға буынды қорғаудың маңызы да кем емес. Пневмония мен вирустық инфекциялардан егу – бұл жай ғана медицина емес, бұл ауыр сырқаттардың алдын алу арқылы дербестікті сақтау құралы. Біз қарт адамдардың белсенді болып қалуына және мәжбүрлі түрде аурухана жатқызылудан бас тартуына көмектесеміз», – деп атап өтті спикер.
Қанат Суханбердиев Қазақстанның иммундау жүйесін нығайтуда айтарлықтай прогресс байқалатынын қадап айтты. Биологиялық қауіпсіздік шаралары күшейтіліп, вакциналарды цифрлық басқаруға көшу жүзеге асырылуда. Елімізде полиовирустың таралуын тежеп қана қоймай, зертханалық бақылау мен биоматериалдарды сақтау процедуралары жаңа деңгейге көтерілуде. Қарағанды облысында инфрақұрылым мен қорды цифрлық талдау бойынша пилоттық жоба мәліметтерге негізделген вакциналарды басқарудың жалпыұлттық жүйесін қалыптастыруға негіз болды.
«Дүниежүзілік денсаулық сақтау ұйымының қолдауымен Қазақстанда мінез-құлық инсайттарына кешенді зерттеулер жүргізілді. Оған ата-аналар, медицина қызметкерлері, мемлекеттік қызметшілер, діни және қоғам қайраткерлері қатысты. Бұл бізге вакциналаудан бас тартуға әсер ететін әлеуметтік және институционалдық факторларды егжей-тегжейлі талдауға мүмкіндік берді. Қоғамдық пікір көшбасшыларымен, соның ішінде Қазақстан Мұсылмандары діни басқармасы мен Православтие шіркеуі өкілдерімен жүргізілген диалог тек бірлескен күш-жігер арқылы ғана азаматтардың денсаулық сақтау жүйесіне деген сенімін нығайта алатынымызды растады», – деп толықтырды ДДСҰ-ның ҚР-дағы елдік кеңсесінің иммундау бағдарламасының үйлестірушісі.