Фото: ашық дереккөз
Желтоқсан айында ел азаматтары зейнетақы жинағын бұрын-соңды болмаған қарқынмен пайдаланды. Бір айдың ішінде тұрғын үйге бағытталған қаржы көлемі жүздеген миллиард теңгеге жетіп, нарықта айқын қозғалыс туғызды, деп жазады Egemen.kz.
Сараптамалық деректерге қарағанда, бір айдың ішінде 339 мыңнан астам өтініш қанағаттандырылып, азаматтар баспана мәселесіне 221 млрд теңгеден астам қаражат жұмсаған. Бұл қараша айындағы көрсеткіштен бірнеше есе жоғары.
Ең көп қаражат тұрғын үй құрылыс жинақ жүйесіндегі салымды толықтыруға бағытталды. Желтоқсанда осы мақсатта 182 мың адам зейнетақы жинағын пайдаланған. Бұл алдыңғы аймен салыстырғанда төрт есеге жуық өсім. Аталған бағыттағы қаржы көлемі де 118 млрд теңгеден асып, жалпы көрсеткіштің негізгі бөлігін құрады.
Мамандар мұндай белсенділікті жылдың соңына тән бірнеше факторлармен байланыстырады. Соның бірі – тұрғын үй құрылыс жинақ жүйесінде мемлекет беретін сыйлықақының жыл аяғына дейін салынған қаражатты қамтитыны. Осы мүмкіндікті пайдалану үшін көптеген азамат дәл желтоқсанда шешім қабылдаған.
Сонымен қатар ипотекалық қарызды ішінара өтеу секілді басқа да мақсаттар бойынша өтініштер саны артқан. Бұл зейнетақы жинағын тек жаңа баспана алу емес, бұрынғы міндеттемелерді жеңілдету құралы ретінде де қолдану үрдісінің күшейгенін аңғартады.
Желтоқсан айындағы қарбаласқа тағы бір жайт әсер етті. 2026 жылға арналған ең төменгі жеткіліктілік шектерінің өсетіні алдын ала жарияланды. Орта есеппен 10 пайызға ұлғайған жаңа талаптар келесі жылдан бастап күшіне енеді. Осыған байланысты көптеген салымшы бұрынғы шарттармен үлгеріп қалуға тырысқан.
Сарапшылардың пікірінше, жыл соңындағы бұл серпін зейнетақы жүйесіне ғана емес, тұрғын үй нарығына да айтарлықтай ықпал етті. Ал алдағы кезеңде азаматтардың мұндай мүмкіндікті қалай пайдаланатыны жаңа талаптар аясында айқындала түспек.