Қызылорда облыстық қоғамдық даму басқармасының «Қоғамдық келісім» КММ ұйымдастыруымен Naman ata спорттық кешенінде мемлекеттік тілді еркін меңгерген этнос оқушылары арасында «Kazakh national games» атты ұлттық спорт түрлерінен сайыс өтті.
Жарыс бес кезең бойынша өрбіді. Қатысушылар садақ ату, арқан тарту, ләңгі тебу, қол күрес және асық ату сияқты ұлттық ойындарда өз шеберліктерін сынады. Сайысқа қала мектептерінен №198, №9, №23, №112 және №8 мектеп оқушылары белсене қатысып, ұлттық рухты көтерген тартысты доданың көрігін қыздырды.
«Қоғамдық келісім» КММ директорының орынбасары Азамат Мукеев жарыс барысында сөз сөйлеп, Қазақстан халқы Ассамблеясының 30 жылдығы аясында мұндай игі бастамалардың жалғасын табатынын атап өтті. Оның айтуынша, ұлттық ойындар жастардың денсаулығын нығайтып қана қоймай, мемлекеттік тіл мен мәдениетке деген құрметті арттыра түседі.
Жарыс қорытындысы бойынша бірінші орынды №8 мектеп оқушылары иеленсе, екінші орынға №112 мектептің командасы жайғасты. Ал үшінші орын №9 мектептің еншісіне бұйырды. Жеңімпаздар бағалы сыйлықтармен марапатталды.
