Иран мен Ресей Хаменеи мен оның отбасын эвакуациялау мәселесін талқылап жатыр.
Iran International порталының дереккөздеріне сүйенсек, Иран билігі Ресеймен елдің жоғарғы көшбасшысы аятолла Әли Хаменеи мен оның отбасы мүшелерін эвакуациялау жоспарын келісіп жатыр.
Келіссөздерге Иранның жоғарғы көшбасшы аппараты басшысының орынбасары жауапты. Басылым мәліметінше, Әли Асгар Хеджази Ресейдегі жоғары лауазымды тұлғалардың бірінен «жағдай күрт нашарлаған жағдайда» Мәскеу Хаменеи мен оның отбасына қауіпсіз көшіру жолын ұйымдастыруға дайын екені жөнінде кепілдік алған.
Сондай-ақ басылымның хабарлауынша, Иран үкіметіндегі басқа да жоғары лауазымды тұлғалар егер елде қауіп күшейсе, шетке кетуді қарастырып жатыр.
Бұған дейін Reuters агенттігі Дональд Трамптың «Израильдің Хаменеи аятолланы өлтіру жоспарына вето қойғаны» туралы ақпарат таратқан болатын. Алайда Израильдің Ұлттық қауіпсіздік кеңесінің басшысы Цахи Ханегби бұл ақпаратты «фейк елінен келген фейк жаңалық» деп жоққа шығарды. Ал Израиль премьер-министрі Биньямин Нетаньяху Израиль армиясының Хаменеиға қастандық жасау жоспары бар деген мәліметтерді жоққа шығарды.
Бұған дейін The Wall Street Journal газеті де израильдік дереккөзге сүйене отырып, Хаменеи Израильдің соққы жасауына болатын ықтимал нысан ретінде қарастырылып отырғанын жазған болатын.
Israel International дерегінше, Израиль Ислам Республикасына қарсы әскери операция бастағаннан кейін Иранның жоғарғы көшбасшысы аятолла Әли Хаменеи жерасты бункеріне жасырынған. Хаменеи Тегеранның солтүстік-шығысындағы Лавизан ауданында орналасқан арнайы бункерде отбасымен бірге жасырынған. Басылым мәліметінше, ол бұл бункерді бұған дейін де — 2024 жылдың сәуірі мен қазанында Израиль шабуылдары кезінде паналаған.
Портал дереккөзі Хаменеи үшін басты ескерту ретінде 15 маусымда Мешхед әуежайына жасалған соққыны атады. Бұл — Израиль армиясы соққы жасаған ең шалғай нысана (Израильден шамамен 2 300 км қашықтықта, Түрікменстан шекарасына жақын орналасқан). Дереккөздің айтуынша, бұл әрекетпен Израиль Хаменеиге оған барлық жер қауіпті екенін көрсеткісі келген.
Әзірге Израиль соққылары салдарынан Иранның саяси көшбасшыларының арасында қаза тапқандар жоқ.
Сондай-ақ, Ресей азаматтарын Ираннан эвакуациялау басталды. Бұл туралы РИА Новости агенттігіне Ресейдің Бакудегі елшілігі хабарлаған.
Алғашқы топ — 14 адам — Иран аумағынан Әзербайжанға шығарылды. Олар мінген автобус Иран мен Әзербайжан арасындағы шекараны кесіп өткен. Эвакуацияланғандардың арасында режиссер Федор Бондарчук, оның түсірілім тобы, сондай-ақ Чайковский атындағы Үлкен симфониялық оркестрдің әртістері бар.
Айта кетейік, 13 маусымда Израиль Иранның ядролық нысандарына, әскери базалары мен командалық құрамына соққы жасады. Өз аумағына бағытталған шабуылдарға жауап ретінде Иран Ислам Республикасы Израильге қарсы әскери операцияны бастады.