Ресей делегациясы, президенттің көмекшісі Владимир Мединскийдің жетекшілігімен, 2 маусым күні Украинаға қақтығысты реттеуге қатысты ресми ұстанымды көрсететін меморандум ұсынбақ.
Бұл туралы Ресей сыртқы істер министрі Сергей Лавров мәлімдеді.
Оның айтуынша, АҚШ, Сауд Арабиясы және Түркияның қолдауымен диалогты қайта бастауға қолайлы жағдай жасалған. Бірінші келіссөз 16 мамырда Ыстанбұлда өтіп, мыңдаған тұтқынды алмастырумен аяқталған болатын — әр тараптан 1000 адам.
– Ресей тарапы уағдаластыққа сай, дағдарыстың негізгі себептерін сенімді түрде жою жолдары жөнінде көзқарасын баяндаған меморандумды жедел түрде дайындады. Бұл құжатты Владимир Мединский бастаған делегация Украина жағына ұсынып, 2 маусымда Ыстанбұлда өтетін екінші тікелей кездесу барысында қажетті түсініктемелер беруге дайын, — делінген Сергей Лавровтың Ресей Сыртқы істер министрлігінің ресми сайтында жарияланған мәлімдемесінде.
Министр Түркияға кездесу ұйымдастырғаны үшін алғыс айтып, бейбіт реттеуге мүдделі елдердің бұл келіссөздерді қолдайтынына үміт білдірді.
Айта кетейік, 16 мамыр күні Ыстанбұлда өткен келіссөз — 2022 жылдан бергі Ресей мен Украина өкілдерінің алғашқы тікелей кездесуі. Делегацияларды Ресей президентінің көмекшісі Владимир Мединский мен Украина қорғаныс министрі Рүстем Умеров басқарды.
Бұған дейін Ресей президентінің баспасөз хатшысы Дмитрий Песков Германия мен Францияны “Украинадағы соғысты одан әрі өршіту жарысына түсті” деп айыптаған болатын.
Бұған дейін Мерц Киевке сапары кезінде Германия Украинамен бірге алыс қашықтықтағы зымырандарды бірлесіп шығарып, оларды қолдануға ешқандай шектеу қоймайтынын айтқан болатын. Бұл туралы Bild басылымы хабарлады. Жақын күндері тиісті келісімге қол қойылуы мүмкін. Украина президенті Владимир Зеленский де Германиямен бірлескен өндірісті құру бойынша келіссөз жүріп жатқанын растады.
Аталған мәлімдемеге байланысты Ресей президентінің баспасөз хатшысы Дмитрий Песков өз пікірін білдіріп, Германия мен Францияның «соғысты одан әрі ушықтыру ісіне» түскенін атап өтті:
«Бұның бәрі бейбіт келіссөздерге кедергі келтіреді. Осындай арандатушы әрекеттерге қарамастан, біз бейбіт реттеу процесі жалғасып, екінші раунд келіссөздері өтіп, меморандум жобаларымен алмасуға мүмкіндік болады деп үміттенеміз», — деді Песков.
Бұған дейін де Ресей тарабы Германияда жасалған алыс қашықтықтағы зымырандарды Украина қолдануы мүмкін екенін сынға алған еді. Ресейлік пропагандист, «Россия сегодня» және RT арнасының бас редакторы Маргарита Симоньян бұл жөнінде өз пікірін білдірген.