«AMANAT» партиясы облыстық филиалы жанындағы партиялық бақылау комиссиясы жанынан құрылған мониторингтік топ мүшелерімен бірге өңірдегі көктемгі су тасқынының алдын-алу бағытындағы жұмыстарға партиялық бақылау жасадық.
Жалпы облыс аумағынан өтетін Сырдария өзенінің ұзындығы 1 274 шақырымды құрайды. Ондағы қорғаныс бөгеті 625,12 шақырым. Осыған орай су тасқынына бейім 29 елдімекен белгіленген. Онда 70 мыңнан аса тұрғын, 14 мыңға жуық тұрғын үй орналасқан. Бүгінгі күні ықтимал су тасқынының алдын алу бойынша кешенді шаралар жүргізілуде. Мәселен, облыс әкімдігімен қысқы-көктемгі кезеңде Сырдария өзенінде үлкен көлемдегі суды қауіпсіз өткізу жоспары бекітіліп, су тасқынына қарсы жасалатын инженерлік жоспардағы іс-шаралар, 87,5 пайызға орындалған.
Облыстық жұмылдыру дайындығы аумақтық және азаматтық қорғаныс басқармасының бөлім басшысы Бақытжан Жүндабековтың айтуынша су басу қаупі бар аймақтарға арнайы техника, күш-құралдары бар жауапты мекемелер бекітілген.
Атқарылып жатқан жұмыстармен таныса келе халықтың қауіпсіздігі бәрінен маңызды екенін тілге тиек етіп, азаматтық қорғау қызметінің басшыларына тәуліктің кез келген уақытында, кез келген нәрсеге дайын болу керектігін айттым.
Жалпы, қазіргі таңда Сырдария өзенімен облысқа келіп жатқан судың көлемі 463 м3/сек. Жетікөл каналының сағасынан 5 км төмен, Қызылорда су торабынан 75 км жоғары мұз ұстасқан. Жөлек елді мекені тұсында 10-15%, Тартоғай елді мекені тұсында 30% Сырдария өзенінде сең жүруде. Барлық қауіпті учаскелерде кезекшілік жұмысы ұйымдастырылуда.